مصر میں حسن کی وہ گرمئ بازار کہاں

مصر میں حسن کی وہ گرمئ بازار کہاں

جنس تو ہے پہ زلیخا سا خریدار کہاں

فیض ہوتا ہے مکیں پر نہ مکاں پر نازل

ہے وہی طور ولے شعلۂ دیدار کہاں

عیش و راحت کے تلاشی ہیں یہ سارے بے درد

ایک ہم کو ہے یہی فکر کہ آزار کہاں

عشق اگر کیجئے دل کیجئے کس سے خالی

درد و غم کم نہیں اس دور میں غمخوار کہاں

قیدی اس سلسلۂ زلف کے اب کم ہیں یقیںؔ

ہیں دل آزار بہت جان گرفتار کہاں

misr mein husn ki wo garmi-e-bazar kahan

jins to hai pe zulekha sa kharidar kahan

faiz hota hai makin par na makan par nazil

hai wahi tur wale shola-e-didar kahan

aish-o-rahat ke talashi hain ye sare be dard

ek ham ko hai yahi fikr ke azar kahan

ishq agar kijiye dil kijiye kis se khali

dard-o-gham kam nahin is daur mein ghamkhwar kahan

qaidi is silsila-e-zulf ke ab kam hain yaqin

hain dil azar bahut jan giraftar kahan