مست و بے خود تیرے مے خانے کا بام و در بنے

مست و بے خود تیرے مے خانے کا بام و در بنے

ساقیا گر تیری چشم مست کا ساغر بنے

حرص کے صحرا میں جو جھونکا چلے سر سر بنے

عشق کے دریا میں جو قطرہ گرے گوہر بنے

بت بنے کعبہ بنا مسجد بنی مندر بنے

عشق کی دنیا میں کیا کیا دل ربا منظر بنے

درس عبرت دور دوراں میں ہے بزم مے کدہ

مے کشوں کی خاک سے کیا کیا خم و ساغر بنے

کیا عجب اس خاکداں کے ہوں کبھی چشم و چراغ

جا کے اوج آسماں پر جو مہ و اختر بنے

بے گداز عشق رنگ حسن بھی کھلتا نہیں

عشق کے سانچے میں ڈھل کر نور کا پیکر بنے

دل کے ویرانے میں کیا کیا حسرتیں آباد ہیں

راہ میں سیل فنا کی کیسے کیسے گھر بنے

اے شہہ کونین در پر غیر کے جھکتا نہیں

تیرے سنگ آستاں کے واسطے جو سر بنے

پھر بہار آئی چمن میں پھر اٹھا جوش جنوں

پھر سر شوریدہ کی خاطر نئے پتھر بنے

فصل گل ہے باغباں اب رخصت پرواز ہے

اب تو تنکے آشیاں کے میرے بال و پر بنے

بندۂ ناظرؔ بھی حاضر تیرے مے خواروں میں ہو

اے شہ‌ لولاک جب تو ساقیٔ کوثر بنے

mast-o-be khud tere mai khane ka bam-o-dar bane

saqiya gar teri chashm-e-mast ka saghar bane

hirs ke sahra mein jo jhonka chale sar sar bane

ishq ke dariya mein jo qatra gire gauhar bane

but bane kaaba bana masjid bani mandir bane

ishq ki duniya mein kya kya dil ruba manzar bane

dars-e-ibrat daur-e-dauran mein hai bazm-e-mai kada

mai kashon ki khak se kya kya kham-o-saghar bane

kya ajab is khakdan ke hun kabhi chashm-o-charagh

ja ke auj-e-asman par jo mah-o-akhtar bane

be gudaz-e-ishq rang-e-husn bhi khulta nahin

ishq ke sanche mein dhal kar nur ka paikar bane

dil ke wirane mein kya kya hasraten abad hain

rah mein sail-e-fana ki kaise kaise ghar bane

ai shah-e-kaunain dar par ghair ke jhukta nahin

tere sang-e-astan ke waste jo sar bane

phir bahar ai chaman mein phir utha josh-e-junun

phir sar-e-shorida ki khatir nae patthar bane

fasl-e-gul hai baghban ab rukhsat-e-parwaz hai

ab to tinke ashiyan ke mere bal-o-par bane

banda-e-nazir bhi hazir tere mai khwaron mein ho

ai shah-e-laulak jab to saqi-e-kausar bane