مرے خلوص کی شدت سے کوئی ڈر بھی گیا

مرے خلوص کی شدت سے کوئی ڈر بھی گیا

وہ پاس آ تو رہا تھا مگر ٹھہر بھی گیا

یہ دیکھنا تھا بچانے بھی کوئی آتا ہے

اگر میں ڈوب رہا تھا تو خود ابھر بھی گیا

اے راستے کے درختو سمیٹ لو سایہ

تمہارے جال سے بچ کر کوئی گزر بھی گیا

کسی طرح سے تمہاری جبیں چمک تو گئی

یہ اور بات سیاہی میں ہاتھ بھر بھی گیا

اسی پہاڑ نے پھونکے تھے کیا کئی جنگل

جو خاک ہو کے مرے ہاتھ پر بکھر بھی گیا

یہیں کہیں مرے ہونٹوں کے پاس پھرتا ہے

وہ ایک لفظ کہ جو ذہن سے اتر بھی گیا

وہ شاخ جھول گئی جس پہ پاؤں قائم تھے

شکیبؔ ورنہ مرا ہاتھ تا ثمر بھی گیا

mire khulus ki shiddat se koi dar bhi gaya

wo pas a to raha tha magar thahar bhi gaya

ye dekhna tha bachane bhi koi ata hai

agar main dub raha tha to khud ubhar bhi gaya

ai raste ke darakhto samet lo saya

tumhare jal se bach kar koi guzar bhi gaya

kisi tarah se tumhari jabin chamak to gai

ye aur bat siyahi mein hath bhar bhi gaya

isi pahar ne phunke the kya kai jangal

jo khak ho ke mire hath par bikhar bhi gaya

yahin kahin mire honton ke pas phirta hai

wo ek lafz ke jo zehn se utar bhi gaya

wo shakh jhul gai jis pe paon qaim the

shakeb warna mira hath ta samar bhi gaya