مست نگاہ ناز کا ارماں نکالیے

مست نگاہ ناز کا ارماں نکالیے

بے خود بنا کے بزم سے اے جاں نکالیے

حسن نظارہ سوز کی ہیں لن ترانیاں

ارمان دید موسی عمراں نکالیے

پنہاں ہے کفر عشق میں ایمان عاشقاں

ظلمت سے نور چشمۂ حیواں نکالیے

دم بھر میں دھوئے جائیں گے سب داغ معصیت

یک قطرہ اشک تجربہ ساماں نکالیے

توحید میں ہے نقش دو رنگی حجاب ذات

ذوق نظر کا حوصلہ اے جاں نکالیے

جب جلوہ ہائے وادیٔ ایمن نظر میں ہوں

خاطر سے وہم روضۂ رضواں نکالیے

دل کو بنا کے نقطۂ پرکار عافیت

پائے طلب بہ ہمت مرداں نکالیے

ذکر خفی ازل سے ہے ورد دل و زباں

شک ہے تو تن سے تار رگ جاں نکالیے

کونین عین علم میں ہے جلوہ گاہ حسن

جیب خرد سے عینک عرفاں نکالیے

ہر جام میں ہے عکس رخ یار جلوہ گر

اے دل سبیل صحبت رنداں نکالیے

مقبولیت سخن کی ہے ساحرؔ جو رنگ بزم

رنگ عیار طبع سخنداں نکالیے

mast-e-nigah-e-naz ka arman nikaliye

be khud bana ke bazm se ai jan nikaliye

husn-e-nazara soz ki hain lan taraniyan

arman-e-did musa imran nikaliye

pinhan hai kufr-e-ishq mein iman-e-ashiqan

zulmat se nur-e-chashma-e-haiwan nikaliye

dam bhar mein dhoe jaenge sab dagh-e-maasiyat

yak qatra-e-ashk tajriba saman nikaliye

tauhid mein hai naqsh do rangi hijab-e-zat

zauq-e-nazar ka hausla ai jan nikaliye

jab jalwa ha-e-wadi-e-eman nazar mein hun

khatir se wahm rauza-e-rizwan nikaliye

dil ko bana ke nuqta-e-parkar-e-afiyat

pae talab ba himmat mardan nikaliye

zikr-e-khafi azal se hai wird-e-dil-o-zaban

shak hai to tan se tar-e-rag-e-jan nikaliye

kaunain ain ilm mein hai jalwa gah-e-husn

jeb-e-khirad se ainak irfan nikaliye

har jam mein hai aks-e-rukh-e-yar jalwa gar

ai dil sabil-e-sohbat-e-rindan nikaliye

maqbuliyyat sukhan ki hai sahir jo rang-e-bazm

rang ayyar-e-tab-e-sukhandan nikaliye