مزہ گناہ کا جب تھا کہ با وضو کرتے

مزہ گناہ کا جب تھا کہ با وضو کرتے

بتوں کو سجدہ بھی کرتے تو قبلہ رو کرتے

کبھی نہ پرورش نخل آرزو کرتے

نمو سے پہلے جو اندیشۂ نمو کرتے

سنیں نہ دل سے تو پھر کیا پڑی تھی خاروں کو

کہ گل کو محرم انجام رنگ و بو کرتے

گناہ تھا بھی تو کیسا گناہ بے لذت

قفس میں بیٹھ کے کیا یاد رنگ و بو کرتے

بہانہ چاہتی تھی موت بس نہ تھا اپنا

کہ میزبانیٔ مہمان حیلہ جو کرتے

دلیل راہ دل شب چراغ تھا تنہا

بلند و پست میں گزری ہے جستجو کرتے

ازل سے جو کشش مرکزی کے تھے پابند

ہوا کی طرح وہ کیا سیر چار سو کرتے

فلک نے بھول بھلیوں میں ڈال رکھا تھا

ہم ان کو ڈھونڈتے یا اپنی جستجو کرتے

اسیر حال نہ مردوں میں ہیں نہ زندوں میں

زبان کٹتی ہے آپس میں گفتگو کرتے

پناہ ملتی نہ امید بے وفا کو کہیں

ہوس نصیب اگر ترک آرزو کرتے

maza gunah ka jab tha ke ba wuzu karte

buton ko sajda bhi karte to qibla ro karte

kabhi na parwarish-e-nakhl-e-arzu karte

numu se pahle jo andesha-e-numu karte

sunen na dil se to phir kya pari thi kharon ko

ke gul ko mahram anjam rang-o-bu karte

gunah tha bhi to kaisa gunah be lazzat

qafas mein baith ke kya yad rang-o-bu karte

bahana chahti thi maut bas na tha apna

ke mezbani-e-mehman-e-hila jo karte

dalil-e-rah-e-dil shab charagh tha tanha

buland-o-past mein guzri hai justuju karte

azal se jo kashish-e-markazi ke the paband

hawa ki tarah wo kya sair char su karte

falak ne bhul bhaliyon mein dal rakha tha

ham un ko dhundte ya apni justuju karte

asir-e-hal na mardon mein hain na zindon mein

zaban katti hai apas mein guftugu karte

panah milti na ummid-e-be wafa ko kahin

hawas nasib agar tark-e-arzu karte