مزاج دہر میں ان کا اشارہ پائے جا

مزاج دہر میں ان کا اشارہ پائے جا

جو ہو سکے تو بہرحال مسکرائے جا

بہار صد چمنستان آرزو بن کر

مرے خیال کی رنگینیوں میں آئے جا

خرد نواز نگاہوں کی آڑ میں رہ کر

فضائے عالم دیوانگی پہ چھائے جا

پلائے جا کہ ابھی ہوش بے خودی ہے مجھے

پلائے جا مجھے ساقی ابھی پلائے جا

دل و جگر پہ گزر جائے گی جو گزرے گی

تری نظر سے جو فتنے اٹھیں اٹھائے جا

ذرا ٹھہر کہ اب انجام سوز غم ہے قریب

چراغ زیست بھڑکنے کو ہے بجھائے جا

سکوت میت فانیؔ ہے اک فسانۂ شوق

لب خموش سے ہر مدعا کو پائے جا

mizaj-e-dahr mein un ka ishara pae ja

jo ho sake to bahrhal muskurae ja

bahar-e-sad chamanistan-e-arzu ban kar

mire khayal ki ranginiyon mein ae ja

khirad nawaz nigahon ki ar mein rah kar

faza-e-alam-e-diwangi pe chhae ja

pilae ja ke abhi hosh be khudi hai mujhe

pilae ja mujhe saqi abhi pilae ja

dil-o-jigar pe guzar jaegi jo guzregi

tiri nazar se jo fitne uthen uthae ja

zara thahar ke ab anjam soz-e-gham hai qarib

charagh-e-zist bharakne ko hai bujhae ja

sukut-e-mayyat fani hai ik fasana-e-shauq

lab-e-khamosh se har muddaa ko pae ja