اثر نہ کم ہو کبھی نالۂ رسا تیرا

اثر نہ کم ہو کبھی نالۂ رسا تیرا

رہے بڑھا ہوا ہر آن حوصلہ تیرا

پڑھی ہے عارض و کاکل کی داستاں میں نے

سنا ہے میں نے فسانہ ذرا ذرا تیرا

اے اشک شوق تجھی سے ہے زندگی دل کی

فزوں ہے چشمۂ حیواں سے مرتبہ تیرا

تمام راہ ہے فیض قدم سے نورانی

ہے ماہتاب زمیں پر کہ نقش پا تیرا

قدم کو تیز کر اس سے زیادہ اے بیتابؔ

نکل گیا ہے بہت دور قافلہ تیرا

asar na kam ho kabhi nala-e-rasa tera

rahe barha hua har an hausla tera

parhi hai ariz-o-kakul ki dastan main ne

suna hai main ne fasana zara zara tera

ai ashk shauq tujhi se hai zindagi dil ki

fuzun hai chashma-e-haiwan se martaba tera

tamam rah hai faiz-e-qadam se nurani

hai mahtab zamin par ke naqsh-e-pa tera

qadam ko tez kar is se ziyada ai betab

nikal gaya hai bahut dur qafila tera