مزے بیتابیوں کے آ رہے ہیں

مزے بیتابیوں کے آ رہے ہیں

وہ ہم کو ہم انہیں سمجھا رہے ہیں

ابھی کل تک تھے کیسے بھولے بھالے

ذرا ابھرے ہیں آفت ڈھا رہے ہیں

کہا اس نے سوال وصل سن کر

کہ مجھ سے آپ کچھ فرما رہے ہیں

وہ بجلی ہیں تو ہوں ان کو مبارک

مجھے کس واسطے تڑپا رہے ہیں

مجھے تو انتظار چارہ گر ہے

الٰہی غش پہ غش کیوں آ رہے ہیں

رہے دامن بھرا ان کا ہمیشہ

لحد پر پھول جو برسا رہے ہیں

سنا کر قصۂ پروانہ و شمع

ہمارے دل کو وہ گرما رہے ہیں

دو روزہ حسن پر پھولے ہیں کیا گل

بڑے کم ظرف ہیں اترا رہے ہیں

کبھی ہم نے پیا تھا بادۂ عشق

جلیلؔ اس کے مزے اب آ رہے ہیں

maze betabiyon ke a rahe hain

wo ham ko ham unhen samjha rahe hain

abhi kal tak the kaise bhule bhale

zara ubhre hain afat dha rahe hain

kaha us ne sawal-e-wasl sun kar

ke mujh se ap kuchh farma rahe hain

wo bijli hain to hun un ko mubarak

mujhe kis waste tarpa rahe hain

mujhe to intizar-e-chara gar hai

ilahi ghash pe ghash kyun a rahe hain

rahe daman bhara un ka hamesha

lahad par phul jo barsa rahe hain

suna kar qissa-e-parwana-o-shama

hamare dil ko wo garma rahe hain

do roza husn par phule hain kya gul

bare kam zarf hain utra rahe hain

kabhi ham ne piya tha bada-e-ishq

jalil us ke maze ab a rahe hain