مبتلا ایک بت کا ہوتا ہوں

مبتلا ایک بت کا ہوتا ہوں

آج ایمان اپنا کھوتا ہوں

تیغ ابرو کے تیر عشق میں یار

جان سے اپنی ہاتھ دھوتا ہوں

جان لے گی یہ مفت کی بیگار

بار رنج فراق ڈھوتا ہوں

غوطے کھاتا ہوں بحر الفت میں

حال پر اپنے آپ روتا ہوں

ایک جھوٹے کے وصف دنداں میں

سچے موتی سدا پروتا ہوں

دل لگاتا ہوں ان کی مژگاں سے

اپنے حق میں یہ کانٹے بوتا ہوں

غم میں اک ماہ وش کے اشکوں سے

دامن آسماں بھگوتا ہوں

بخت خفتہ کا ہوں دل بیدار

کون شب اے وقارؔ سوتا ہوں

mubtala ek but ka hota hun

aj iman apna khota hun

tegh-e-abru ke tir-e-ishq mein yar

jan se apni hath dhota hun

jan legi ye muft ki begar

bar ranj-e-firaq dhota hun

ghaute khata hun bahr-e-ulfat mein

hal par apne ap rota hun

ek jhute ke wasf-e-dandan mein

sachche moti sada pirota hun

dil lagata hun un ki mizhgan se

apne haq mein ye kante bota hun

gham mein ik mah wash ke ashkon se

daman-e-asman bhigota hun

bakht-e-khufta ka hun dil-e-bedar

kaun shab ai waqar sota hun