مجرم

یہی رستہ مری منزل کی طرف جاتا ہے

جس کے فٹ پاتھ فقیروں سے اٹے رہتے ہیں

خستہ کپڑوں میں یہ لپٹے ہوئے مریل ڈھانچے

یہ بھکاری کہ جنہیں دیکھ کے گھن آتی ہے

ہڈیاں جسم کی نکلی ہوئی پچکے ہوئے گال

میلے سر میں جوئیں، اعضا سے ٹپکتا ہوا کوڑھ

روح بیمار، بدن سست، نگاہیں پامال

ہاتھ پھیلائے پڑے رہتے ہیں روگی انسان

چند بیواؤں کے مدقوق سے پیلے چہرے

کچھ ہوس کار نگاہوں میں اتر جاتے ہیں

جن کے افلاس زدہ جسم، ڈھلکتے سینے

چند سکوں کے عوض شب کو بکا کرتے ہیں

شدت فاقہ سے روتے ہوئے ننھے بچے

ایک روٹی کے نوالے سے بہل جاتے ہیں

یا سر شام ہی سو جاتے ہیں بھوکے پیاسے

ماں کی سوکھی ہوئی چھاتی کو دبا کر منہ میں

چند بد زیب سے شہرت زدہ انساں اکثر

اپنی دولت و سخاوت کی نمائش کے لیے

یا کبھی رحم کے جذبے سے حرارت پا کر

چار چھ پیسے انہیں بخش دیا کرتے ہیں

کیا فقط رحم کی حق دار ہیں ننگی روحیں؟

کیوں یہ انسانوں پہ انسان ترس کھاتے ہیں؟

کیوں انہیں دیکھ کے احساس تہی دستی ہے

اکثر اوقات میں کترا کے نکل جاتا ہوں؟

یہی رستہ مری منزل کی طرف جاتا ہے

yahi rasta miri manzil ki taraf jata hai

jis ke fit path faqiron se ate rahte hain

khasta kapron mein ye lipte hue maryal dhanche

ye bhikari ke jinhen dekh ke ghin ati hai

haddiyan jism ki nikli hui pichke hue gal

mele sar mein joen, aaza se tapakta hua korh

ruh-e-bimar, badan sust, nigahen pamal

hath phailae pare rahte hain rogi insan

chand bewaon ke madquq se pile chehre

kuchh hawas kar nigahon mein utar jate hain

jin ke iflas zada jism, dhalakte sine

chand sakun ke ewaz shab ko buka karte hain

shiddat-e-faqa se rote hue nanhe bachche

ek roti ke niwale se bahal jate hain

ya sar-e-sham hi so jate hain bhuke pyase

man ki sukhi hui chhati ko daba kar munh mein

chand bad zeb se shohrat zada insan aksar

apni daulat-o-sakhawat ki numaish ke liye

ya kabhi rahm ke jazbe se hararat pa kar

char chhe paise unhen bakhsh diya karte hain

kya faqat rahm ki haq dar hain nangi ruhen?

kyun ye insanon pe insan taras khate hain?

kyun unhen dekh ke ehsas tahi dasti hai

aksar auqat mein katra ke nikal jata hun?

yahi rasta miri manzil ki taraf jata hai