مثل حباب بحر نہ اتنا اچھل کے چل

مثل حباب بحر نہ اتنا اچھل کے چل

ہیں ساتھ ساتھ موج حوادث سنبھل کے چل

برگ خزاں رسیدہ سے آتی تھی یہ صدا

اس باغ سبز پر کف افسوس مل کے چل

درپئے نہنگ مرگ ہے درپیش چاہ گور

مستی نہ کر حواس میں آ مت مچل کے چل

سوتے ہیں لوگ تار ہیں کوچے گزر ہے تنگ

تاریک شب ہے ساتھ چراغ عمل کے چل

اے تن پرست جامۂ صورت کثیف ہے

بزم حضور دوست میں کپڑے بدل کے چل

آتی ہے زیر خاک سے آواز ہر قدم

افتادگان راہ کے سر مت کچل کے چل

کب تک کثافتوں میں رہے گا برنگ سرد

آب رواں کی طرح نکل اور نکل کے چل

جوں شمع تجھ کو آتش غم سے گریز کیوں

سر پر دھری ہے آگ قدم تک پگھل کے چل

جوں نخل شمع برق تجلی گرے کہیں

داغوں سے آبلوں سے بیاںؔ پھول پھل کے چل

misl-e-habab-e-bahr na itna uchhal ke chal

hain sath sath mauj-e-hawadis sambhal ke chal

barg-e-khizan rasida se ati thi ye sada

is bagh-e-sabz par kaf-e-afsos mil ke chal

darpae nahang-e-marg hai darpesh chah-e-gor

masti na kar hawas mein a mat machal ke chal

sote hain log tar hain kuche guzar hai tang

tarik shab hai sath charagh-e-amal ke chal

ai tan parast jama-e-surat kasif hai

bazm-e-huzur-e-dost mein kapre badal ke chal

ati hai zer-e-khak se awaz har qadam

uftadagan rah ke sar mat kuchal ke chal

kab tak kasafaton mein rahega barang-e-sard

ab-e-rawan ki tarah nikal aur nikal ke chal

jun shama tujh ko atish-e-gham se gurez kyun

sar par dhari hai ag qadam tak pighal ke chal

jun nakhl-e-shama barq-e-tajalli gire kahin

daghon se ablon se bayan phul phal ke chal