مجسم داغ حسرت ہوں سراپا نقش عبرت کا

مجسم داغ حسرت ہوں سراپا نقش عبرت کا

مجھے دیکھو کہ ہوتا ہے یہی انجام الفت کا

انہیں شوق دل آزاری ہمیں ذوق وفاداری

خدا حافظ ہے اب اپنے کشور کار الفت کا

وصال یار کی اے دل کوئی پر زور کوشش کر

ہوائے آہ سے پردہ اٹھا دے شام فرقت کا

دل پر شوق نے ڈالا ہے مجھ کو کس کشاکش میں

ادھر ہے حد کی بے صبری ادھر وعدہ قیامت کا

تم ایسے بے خبر بھی شاذ ہوں گے اس زمانے میں

کہ دل میں رہ کے اندازہ نہیں ہے دل کی حالت کا

جہاں میں چار دن رہ کر فقط بوئے وفا دینا

گلوں سے میں سبق لیتا ہوں آئین صحبت کا

لگا رکھتا ہے اس کی نذر کو چشم تمنا نے

وہ اک آنسو کہ مجموعہ ہے ساری دل کی طاقت کا

مری قدرت سے اب اخفائے راز عشق باہر ہے

کہ رنگ آنے لگا ہے آنسوؤں میں خون حسرت کا

اک آہ سرد بھر لیتا ہوں جب تم یاد آتے ہو

خلاصہ کس قدر میں نے کیا ہے رنج فرقت کا

وہ دل ہے بزم عالم میں نظرؔ اک ساز بشکستہ

نہ چھیڑے تار ہستی پر جو نغمہ اس کی قدرت کا

mujassam dagh-e-hasrat hun sarapa naqsh-e-ibrat ka

mujhe dekho ke hota hai yahi anjam ulfat ka

unhen shauq-e-dil azari hamen zauq-e-wafadari

khuda hafiz hai ab apne kishwar kar ulfat ka

wisal-e-yar ki ai dil koi pur zor koshish kar

hawae ah se parda utha de sham-e-furqat ka

dil par shauq ne dala hai mujh ko kis kashakash mein

idhar hai had ki be sabri idhar waada qayamat ka

tum aise be khabar bhi shaz honge is zamane mein

ke dil mein rah ke andaza nahin hai dil ki halat ka

jahan mein char din rah kar faqat bu-e-wafa dena

gulon se main sabaq leta hun ain-e-sohbat ka

laga rakhta hai us ki nazr ko chashm-e-tamanna ne

wo ik ansu ke majmua hai sari dil ki taqat ka

miri qudrat se ab ikhfa-e-raz-e-ishq bahar hai

ke rang ane laga hai ansuon mein khun-e-hasrat ka

ik ah-e-sard bhar leta hun jab tum yad ate ho

khulasa kis qadar main ne kiya hai ranj-e-furqat ka

wo dil hai bazm-e-alam mein nazar ik saz-e-bashkasta

na chhere tar-e-hasti par jo naghma us ki qudrat ka