مثال سایہ محبت میں جال اپنا ہوں

مثال سایہ محبت میں جال اپنا ہوں

تمہارے ساتھ گرفتار حال اپنا ہوں

سرشک سرخ کو جاتا ہوں جو پیے ہر دم

لہو کا پیاسا علی الاتصال اپنا ہوں

اگرچہ نشہ ہوں سب میں خم جہاں میں لیک

برنگ مے عرق انفعال اپنا ہوں

مری نمود نے مجھ کو کیا برابر خاک

میں نقش پا کی طرح پائمال اپنا ہوں

ہوئی ہے زندگی دشوار مشکل آساں کر

پھروں چلوں تو ہوں پر میں وبال اپنا ہوں

ترا ہے وہم کہ یہ ناتواں ہے جامے میں

وگرنہ میں نہیں اب اک خیال اپنا ہوں

بلا ہوئی ہے مری گو کا طبع روشن میرؔ

ہوں آفتاب ولیکن زوال اپنا ہوں

misal-e-saya mohabbat mein jal apna hun

tumhare sath giraftar hal apna hun

sarishk surkh ko jata hun jo piye har dam

lahu ka pyasa ali alattisal apna hun

agarche nasha hun sab mein kham jahan mein lek

barang-e-mai araq-e-infial apna hun

miri numud ne mujh ko kiya barabar khak

main naqsh-e-pa ki tarah paimal apna hun

hui hai zindagi dushwar mushkil asan kar

phirun chalun to hun par main wabal apna hun

tira hai wahm ke ye natawan hai jame mein

wagarna mein nahin ab ik khayal apna hun

bala hui hai miri go ka tab-e-raushan mir

hun aftab walekin zawal apna hun