مجبوریاں

میں آہیں بھر نہیں سکتا کہ نغمے گا نہیں سکتا

سکوں لیکن مرے دل کو میسر آ نہیں سکتا

کوئی نغمے تو کیا اب مجھ سے میرا ساز بھی لے لے

جو گانا چاہتا ہوں آہ وہ میں گا نہیں سکتا

متاع سوز و ساز زندگی پیمانہ و بربط

میں خود کو ان کھلونوں سے بھی اب بہلا نہیں سکتا

وہ بادل سر پہ چھائے ہیں کہ سر سے ہٹ نہیں سکتے

ملا ہے درد وہ دل کو کہ دل سے جا نہیں سکتا

ہوس کاری ہے جرم خودکشی میری شریعت میں

یہ حد آخری ہے میں یہاں تک جا نہیں سکتا

نہ طوفاں روک سکتے ہیں نہ آندھی روک سکتی ہے

مگر پھر بھی میں اس قصر حسیں تک جا نہیں سکتا

وہ مجھ کو چاہتی ہے اور مجھ تک آ نہیں سکتی

میں اس کو پوجتا ہوں اور اس کو پا نہیں سکتا

یہ مجبوری سی مجبوری یہ لاچاری سی لاچاری

کہ اس کے گیت بھی دل کھول کر میں گا نہیں سکتا

زباں پر بے خودی میں نام اس کا آ ہی جاتا ہے

اگر پوچھے کوئی یہ کون ہے بتلا نہیں سکتا

کہاں تک قصۂ آلام فرقت مختصر یہ ہے

یہاں وہ آ نہیں سکتی وہاں میں جا نہیں سکتا

حدیں وہ کھینچ رکھی ہیں حرم کے پاسبانوں نے

کہ بن مجرم بنے پیغام بھی پہنچا نہیں سکتا

main ahen bhar nahin sakta ke naghme ga nahin sakta

sukun lekin mire dil ko muyassar a nahin sakta

koi naghme to kya ab mujh se mera saz bhi le le

jo gana chahta hun ah wo main ga nahin sakta

mata-e-soz-o-saz-e-zindagi paimana-o-barbat

main khud ko in khilaunon se bhi ab bahla nahin sakta

wo badal sar pe chhae hain ke sar se hat nahin sakte

mila hai dard wo dil ko ke dil se ja nahin sakta

hawas kari hai jurm-e-khudkushi meri shariat mein

ye had-e-akhiri hai main yahan tak ja nahin sakta

na tufan rok sakte hain na andhi rok sakti hai

magar phir bhi main is qasr-e-hasin tak ja nahin sakta

wo mujh ko chahti hai aur mujh tak a nahin sakti

main us ko pujta hun aur us ko pa nahin sakta

ye majburi si majburi ye lachari si lachari

ke us ke git bhi dil khol kar main ga nahin sakta

zaban par be khudi mein nam us ka a hi jata hai

agar puchhe koi ye kaun hai batla nahin sakta

kahan tak qissa-e-alam-e-furqat mukhtasar ye hai

yahan wo a nahin sakti wahan main ja nahin sakta

haden wo khinch rakhi hain haram ke pasbanon ne

ke ban mujrim bane paigham bhi pahuncha nahin sakta