لاکھ لاکھ احسان جس نے درد پیدا کر دیا

لاکھ لاکھ احسان جس نے درد پیدا کر دیا

جس نے اس دل کو ہتھیلی کا پھپھولا کر دیا

دیکھنا مغرب کی جانب یہ شفق کا پھولنا

ڈوبتے سورج نے سونے میں سہاگا کر دیا

زندگی اور موت میں اک عمر سے تھی کشمکش

وقت پر دو ہچکیوں نے پاک جھگڑا کر دیا

اک شرارہ سا قریب شمع جا کر مل گیا

آتش پروانہ نے شعلے کو دونا کر دیا

بلبل تصویر ہوں اب بولنا ہے ناگوار

تیری اس ہنگامہ آرائی نے چپکا کر دیا

اس کو کہتے ہیں لگی پروانے جل بجھ ڈوب مر

روتے روتے شمع نے آخر سویرا کر دیا

دے دیا آنکھیں لڑا کر اس پری پیکر نے جام

میں نشے میں چور تھا ہی اور اندھا کر دیا

کیا گرامی ہستیاں ہیں حضرت عثمانؔ و شادؔ

شاعرؔ ان دونوں نے دنیا میں اجالا کر دیا

lakh lakh ehsan jis ne dard paida kar diya

jis ne is dil ko hatheli ka phphula kar diya

dekhna maghrib ki janib ye shafaq ka phulna

dubte suraj ne sone mein suhaga kar diya

zindagi aur maut mein ik umr se thi kashmakash

waqt par do hichkiyon ne pak jhagra kar diya

ik sharara sa qarib-e-shama ja kar mil gaya

atish-e-parwana ne shole ko duna kar diya

bulbul-e-taswir hun ab bolna hai nagawar

teri is hangama arai ne chipka kar diya

us ko kahte hain lagi parwane jal bujh dub mar

rote rote shama ne akhir sawera kar diya

de diya ankhen lara kar us pari paikar ne jam

main nashe mein chur tha hi aur andha kar diya

kya garami hastiyan hain hazrat-e-usman-o-shad

shayar in donon ne duniya mein ujala kar diya