Arooz is now on the App Store, for iPhone and iPad. Download →

All poetry

لالہ رو تم غیر کے پالے پڑے

Waliullah Muhib

لالہ رو تم غیر کے پالے پڑے

دیکھنے کے ہیں ہمیں لالے پڑے

جب نظر سرمے کے دنبالے پڑے

دل کے پیچھے تیر اور بھالے پڑے

اس برس فرقت میں تیرے اشک کے

چشم سے بہتے ہیں پرنالے پڑے

ہم ہوائے وصل میں یاں تک پھرے

جو ہوس کے پاؤں میں چھالے پڑے

عارض اس کے پر نہیں زلف سیاہ

گنج پر سوتے ہیں دو کالے پڑے

آہ اور نالے کے گرداگرد دل

پھرتے ہیں راتوں کو رکھوالے پڑے

کیا نزاکت ہے کہ بوسہ لیتے ہی

ہونٹ پر اس گل کے تب خالے پڑے

آنکھیں اس خوں خار سے پھر جا لڑیں

زخم دل کے ہیں ابھی آلے پڑے

عشق کے ہاتھوں سے جوں فرہاد و قیس

کیا کہیں کس کس کے گھر گھالے پڑے

عاشق اس کی مست آنکھوں کے مدام

پھرتے ہیں بے ہوش متوالے پڑے

شیخ تم فی الحال در بزم سماع

بد اصولی سے ہو بے تالے پڑے

اپنے گھر میں شیخ اندھیری رات میں

ہاتھ جو آوے اسے جا لے پڑے

کھولے یہ شیشوں کے منہ ساقی نے آج

بزم میں ترتے ہیں کیا پیالے پڑے

اڑتے پھرتے ہیں زمیں پر شکل ابر

پرچہ پرچہ روئی کے گالے پڑے

در پر اس گل کے محبؔ تم سے ہزار

پھرتے ہیں دل بیچنے والے پڑے