لاکھ پردے سے رخ انور عیاں ہو جائے گا

لاکھ پردے سے رخ انور عیاں ہو جائے گا

پردہ کھل جائے گا ہر پردہ کتاں ہو جائے گا

جوہر تیغ اصالت سب عیاں ہو جائے گا

امتحاں کے وقت اپنا امتحاں ہو جائے گا

تو اگر اے ماہ آ نکلا کسی دن بعد مرگ

پردۂ خاک مزار اپنا کتاں ہو جائے گا

پیچ زلفوں کے جو کھل جائیں گے روئے یار پر

سنبل تر آتش گل کا دھواں ہو جائے گا

تو وہ گل رو ہے کہ تجھ کو دیکھ کر نکلے گی جان

بلبل روح و رواں بے آشیاں ہو جائے گا

روئے رنگیں کی حکایت نظم اگر کرنے لگیں

برقؔ سب دیواں ہمارا بوستاں ہو جائے گا

lakh parde se rukh-e-anwar ayan ho jaega

parda khul jaega har parda katan ho jaega

jauhar-e-tegh-e-asalat sab ayan ho jaega

imtihan ke waqt apna imtihan ho jaega

tu agar ai mah a nikla kisi din baad-e-marg

parda-e-khak mazar apna katan ho jaega

pech zulfon ke jo khul jaenge ru-e-yar par

sumbul-e-tar atish-e-gul ka dhuan ho jaega

to wo gul ru hai ke tujh ko dekh kar niklegi jan

bulbul-e-ruh-o-rawan be ashiyan ho jaega

ru-e-rangin ki hikayat nazm agar karne lagen

barq sab diwan hamara bostan ho jaega