اثر ایسا ہے تپ غم میں دوا کا الٹا

اثر ایسا ہے تپ غم میں دوا کا الٹا

نبض دیکھے تو ہو بیمار مسیحا الٹا

ہم سری کی قد موزوں و رخ روشن سے

چور کی طرح دیا شمع کو لٹکا الٹا

صبح کو چہرۂ خورشید کرن سے نکلا

سر سے اس مہ نے جو مقیس کا سہرا الٹا

خفقان غم فرقت سے دل ایسا الٹا

منہ کے باہر نکل آیا جو کلیجہ الٹا

حسرت دید میں آخر کو دم اپنا الٹا

پردۂ چشم نہ اس شوخ نے اپنا الٹا

ناز و انداز نے دیوانہ بنایا دل کو

اس پری نے جو دم رقص دوپٹا الٹا

میں تو کرتا نہیں اے عرشؔ گلہ فرقت کا

شکوۂ بخت وہ کج باز ہے کرتا الٹا

asar aisa hai tap-e-gham mein dawa ka ulta

nabz dekhe to ho bimar masiha ulta

ham siri ki qad-e-mauzun-o-rukh-e-raushan se

chur ki tarah diya shama ko latka ulta

subh ko chehra-e-khurshid kiran se nikla

sar se us mah ne jo maqis ka sehra ulta

khafqan gham-e-furqat se dil aisa ulta

munh ke bahar nikal aya jo kaleja ulta

hasrat-e-did mein akhir ko dam apna ulta

parda-e-chashm na us shokh ne apna ulta

naz-o-andaz ne diwana banaya dil ko

us pari ne jo dam raqs dopatta ulta

main to karta nahin ai arsh gila furqat ka

shikwa-e-bakht wo kaj baz hai karta ulta