آئنہ خانہ کریں گے دل ناکام کو ہم

آئنہ خانہ کریں گے دل ناکام کو ہم

پھیریں گے اپنی طرف روئے دل آرام کو ہم

شام سے صبح تلک دور شراب آخر ہے

روتے ہیں دیکھ کے خنداں دہن جام کو ہم

یاد رکھنے کی جگہ ہے یہ طلسم حیرت

صبح کو دیکھتے ہی بھول گئے شام کو ہم

آنکھ وہ فتنۂ دوراں کسے دکھلاتا ہے

شعبدہ جانتے ہیں گردش ایام کو ہم

فتنہ انگیزی بھی چھپتی ہے کہیں پردے میں

سنتے ہیں گبر و مسلماں سے ترے نام کو ہم

خون قاصد تو وہ سفاک سمجھتا ہے حلال

کسی غماز سے بھجوائیں گے پیغام کو ہم

پاؤں پکڑے ہیں زمیں نے یہ ترے کوچہ کی

رہ صد سالہ سمجھتے ہیں اب اک گام کو ہم

دیدۂ یار کہیں کیا اسے کیف مے میں

بھون کر روز گزک کرتے ہیں بادام کو ہم

بیزۂ خط سے ہوئی اس کی کدورت دہ چند

اب صفائی کے لیے ڈھونڈیں گے حجام کو ہم

یہی تحصیل محبت کا ہے عالم تا حال

پختہ کرتے ہیں ہنوز آرزوئے خام کو ہم

لطف حاصل ہو جو زلفوں میں گرفتاری کا

مول لیں دل کی اسیری کے لیے دام کو ہم

کوچۂ یار میں اپنا جو گزر ہوتا ہے

نگراں رہتے ہیں حسرت سے در و بام کو ہم

حسن سے عشق کی خاطر ہے خدا نے بھیجا

کرتے ہیں آتشؔ اسے آئے ہیں جس کام کو ہم

aina khana karenge dil-e-nakam ko ham

pherenge apni taraf ru-e-dil aram ko ham

sham se subh talak daur-e-sharab akhir hai

rote hain dekh ke khandan dahan-e-jam ko ham

yad rakhne ki jagah hai ye tilism-e-hairat

subh ko dekhte hi bhul gae sham ko ham

ankh wo fitna-e-dauran kise dikhlata hai

shobada jante hain gardish-e-ayyam ko ham

fitna angezi bhi chhupti hai kahin parde mein

sunte hain gabr-o-musalman se tire nam ko ham

khun qasid to wo saffak samajhta hai halal

kisi ghammaz se bhijwaenge paigham ko ham

paon pakre hain zamin ne ye tire kucha ki

rah-e-sad sala samajhte hain ab ik gam ko ham

dida-e-yar kahen kya use kaif-e-mai mein

bhun kar roz gazak karte hain badam ko ham

bezeh-e-khat se hui us ki kudurat da chand

ab safai ke liye dhundenge hajjam ko ham

yahi tahsil mohabbat ka hai alam ta hal

pukhta karte hain hanoz arzu-e-kham ko ham

lutf hasil ho jo zulfon mein giraftari ka

mol len dil ki asiri ke liye dam ko ham

kucha-e-yar mein apna jo guzar hota hai

nigaran rahte hain hasrat se dar-o-bam ko ham

husn se ishq ki khatir hai khuda ne bheja

karte hain atish use ae hain jis kam ko ham