قریۂ ویراں
مختار صدیقیجھلسے پیڑ جلی آبادی کھیتی سوکھی خرمن راکھ
ہست و بود کا مدفن راکھ
گرتے بام و در کے لیے گلیوں کا آغوش
جیسے یہ دیواروں کو تھے کب سے وبال دوش
بار ہٹا تو آیا ہوش
پنگھٹ اور چوپال بھی سونے راہیں بھی سنسان
گلیاں اور کوچے ویران
جھونکے سوکھے پتے رولیں بکھری راکھ اڑائیں
راکھ اور پتے بن کے بگولے اپنا ناچ دکھائیں
اور وہیں رہ جائیں
یہ بستی اب توڑ چکی ہے ہستی کی زنجیر گراں
اور قیود زمان و مکاں
وقت کے ڈاکو چکر اس کو بساط مطابق لوٹ چکے
اس کے لیے ماحول و فضا کے سارے بندھن ٹوٹ چکے
ماضی و حال بھی چھوٹ چکے
کون آئے جو آ کر اس میں زیست کے رنگ بھرے
کھیتوں کو سرسبز کرے
گلی گلی اور کوچہ کوچہ پنگھٹ اور چوپال
کھیلتے بچوں ہنستی جوانی سے کر دے چونچال
زندہ کر دے ماضی و حال
jhulse per jali abadi kheti sukhi khirman rakh
hast-o-bud ka madfan rakh
girte bam-o-dar ke liye galiyon ka aghosh
jaise ye diwaron ko the kab se wabal-e-dosh
bar hata to aya hosh
panghat aur chaupal bhi sone rahen bhi sunsan
galiyan aur kuche wiran
jhonke sukhe patte rolen bikhri rakh uraen
rakh aur patte ban ke bagule apna nach dikhaen
aur wahin rah jaen
ye basti ab tor chuki hai hasti ki zanjir giran
aur quyud zaman-o-makan
waqt ke dako chakkar us ko bisat-e-mutabiq laut chuke
us ke liye mahaul-o-faza ke sare bandhan tut chuke
mazi-o-hal bhi chhut chuke
kaun ae jo a kar is mein zist ke rang bhare
kheton ko sarsabz kare
gali gali aur kucha kucha panghat aur chaupal
khelte bachchon hansti jawani se kar de chaunchal
zinda kar de mazi-o-hal