قدرداں کوئی نہ اسفل ہے نہ اعلیٰ اپنا

قدرداں کوئی نہ اسفل ہے نہ اعلیٰ اپنا

نہ زمین پر نہ فلک پر ہے ٹھکانا اپنا

دست شفقت سے دیا آپ نے چھلا اپنا

ہاتھ بھر بڑھ گیا سینے میں کلیجہ اپنا

آئے مستی کے دن ایام بہاری آئے

شیر کی طرح لگا گونجنے صحرا اپنا

نہ بھرا جام نہ ساقی نے کبھی یاد کیا

طاق نسیاں پہ دھرا رہتا ہے مینا اپنا

دیکھتے بھی وہ نہیں آنکھ اٹھا کر ہم کو

صاد ہوتا نہیں سرکار میں چہرا اپنا

کس کے ہاتھوں ہدف تیر بلا ہم نہ ہوئے

دل ہے مانند کماں سب سے کشیدہ اپنا

دل جلے دوو پریشاں کی طرح ہیں برباد

ہم کہیں ٹھہریں تو بتلائیں ٹھکانا اپنا

کون مشتاق ہے ہم داغ دکھائیں کس کو

دیکھیں خود صورت طاؤس تماشا اپنا

شرم بندے کی ترے ہاتھ ہے اے رب کریم

نہ کھلے خاک کے پردے میں بھی پردا اپنا

ہم کو جو رنج پہنچتے ہیں وہ کس سے کہئے

ہم کو مہمان سمجھتی نہیں دنیا اپنا

زندگی چاہئے جنگل میں بھی کچھ خوف نہیں

اے جنوں شیر کا آخر کبھی گھر تھا اپنا

طرفہ خشکی و تری کی ہے ہمیں سیر اے بحرؔ

دشت ہے اپنا غبار اشک ہے دریا اپنا

qadardan koi na asfal hai na aala apna

na zamin par na falak par hai thikana apna

dast-e-shafqat se diya ap ne chhila apna

hath bhar barh gaya sine mein kaleja apna

ae masti ke din ayyam-e-bahari ae

sher ki tarah laga gunjne sahra apna

na bhara jam na saqi ne kabhi yad kiya

taq-e-nasiyan pe dhara rahta hai mina apna

dekhte bhi wo nahin ankh utha kar ham ko

sad hota nahin sarkar mein chehra apna

kis ke hathon hadaf-e-tir bala ham na hue

dil hai manind-e-kaman sab se kashida apna

dil jale dow pareshan ki tarah hain barbad

ham kahin thahren to batlaen thikana apna

kaun mushtaq hai ham dagh dikhaen kis ko

dekhen khud surat-e-taus tamasha apna

sharm bande ki tire hath hai ai rab-e-karim

na khule khak ke parde mein bhi parda apna

ham ko jo ranj pahunchte hain wo kis se kahiye

ham ko mehman samajhti nahin duniya apna

zindagi chahiye jangal mein bhi kuchh khauf nahin

ai junun sher ka akhir kabhi ghar tha apna

turfa khushki-o-tiri ki hai hamen sair ai bahr

dasht hai apna ghubar ashk hai dariya apna