قسم نہ کھاؤ تغافل سے باز آنے کی

قسم نہ کھاؤ تغافل سے باز آنے کی

کہ دل میں اب نہیں طاقت ستائے جانے کی

ہماری موت نے کچھ مختصر کیا ورنہ

کچھ انتہا ہی نہ تھی عشق کے فسانے کی

گری نہ برق کچھ اس خوف سے مرے ہوتے

تڑپ کے آگ بجھا دوں نہ آشیانے کی

تمہارا درد تو درماں بنا لیا ہم نے

اب اور سوچیے تدبیر دل دکھانے کی

زمانہ کفر محبت سے کر چکا تھا گریز

تری نظر نے پلٹ دی ہوا زمانے کی

پلٹ پلٹ کے قفس ہی کی سمت جاتا ہوں

کسی نے راہ بتائی نہ آشیانے کی

نجات دی غم دنیا سے درد دل نے مجھے

یہ ایک راہ ملی غم سے چھوٹ جانے کی

وہ صبح عید کا منظر ترے تصور میں

وہ دل میں آ کے ادا تیرے مسکرانے کی

بتا رہا ہے ہر انداز خاک فانیؔ کا

یہ خاک ہے اسی کافر کے آستانے کی

qasam na khao taghaful se baz ane ki

ke dil mein ab nahin taqat satae jane ki

hamari maut ne kuchh mukhtasar kiya warna

kuchh intiha hi na thi ishq ke fasane ki

giri na barq kuchh is khauf se mire hote

tarap ke ag bujha dun na ashiyane ki

tumhara dard to darman bana liya ham ne

ab aur sochiye tadbir dil dikhane ki

zamana kufr-e-mohabbat se kar chuka tha gurez

tiri nazar ne palat di hua zamane ki

palat palat ke qafas hi ki samt jata hun

kisi ne rah batai na ashiyane ki

najat di gham-e-duniya se dard-e-dil ne mujhe

ye ek rah mili gham se chhut jane ki

wo subh-e-eid ka manzar tire tasawwur mein

wo dil mein a ke ada tere muskurane ki

bata raha hai har andaz-e-khak fani ka

ye khak hai usi kafir ke astane ki