قصۂ زیست مختصر کرتے

قصۂ زیست مختصر کرتے

کچھ تو اپنی سی چارہ گر کرتے

موت کی نیند سو گئے بیمار

روز کس شام کو سحر کرتے

سچ ہے ہر نالہ کیوں رسا ہوتا

میرے نالے تھے کیوں اثر کرتے

خود وفا کیا وفا کا بدلہ کیا

لطف احسان تھا اگر کرتے

کر لیا تیرے نام پر سجدہ

اب کہاں قصد سنگ در کرتے

آس ہوتی تو اس سہارے پر

صبر ممکن نہ تھا مگر کرتے

کاش آئینہ ہاتھ سے رکھ کر

تم مرے حال پر نظر کرتے

طول روداد غم معاذ اللہ

عمر گزری ہے مختصر کرتے

غم نے مہلت نہ دی کہ ہم فانیؔ

اور کچھ دن ابھی بسر کرتے

qissa-e-zist mukhtasar karte

kuchh to apni si chara gar karte

maut ki nind so gae bimar

roz kis sham ko sahar karte

sach hai har nala kyun rasa hota

mere nale the kyun asar karte

khud wafa kya wafa ka badla kiya

lutf ehsan tha agar karte

kar liya tere nam par sajda

ab kahan qasd-e-sang-e-dar karte

as hoti to is sahare par

sabr mumkin na tha magar karte

kash aina hath se rakh kar

tum mire hal par nazar karte

tul-e-rudad-e-gham maaz allah

umr guzri hai mukhtasar karte

gham ne mohlat na di ke ham fani

aur kuchh din abhi basar karte