قصر جاناں تک رسائی ہو کسی تدبیر سے

قصر جاناں تک رسائی ہو کسی تدبیر سے

طائر جاں کے لیے پر مانگ لوں میں تیر سے

ان کو کیا دھوکا ہوا مجھ ناتواں کو دیکھ

میری صورت کیوں ملاتے ہیں مری تصویر سے

گالیاں دے کر بجائے قم کے اے رشک مسیح

آپ نے مردے جلائے ہیں نئی تدبیر سے

صدقے اے قاتل ترے مجھ تشنۂ دیدار کی

تشنگی جاتی رہی آب دم شمشیر سے

عشوے سے غمزے سے شوخی سے ادا سے ناز سے

مٹنے والا ہوں مٹا دیجے کسی تدبیر سے

اک سوال وصل پر دو دو سزائیں دیں مجھے

تیغ سے کاٹا زباں کو سی دئے لب تیر سے

کچھ نہ ہو اے انقلاب آسماں اتنا تو ہو

غیر کی قسمت بدل جائے میری تقدیر سے

زندگی سے کیوں نہ ہو نفرت کہ محو زلف ہوں

قید ہستی مجھ کو بیدمؔ کم نہیں زنجیر سے

qasr-e-janan tak rasai ho kisi tadbir se

tair-e-jan ke liye par mang lun main tir se

un ko kya dhoka hua mujh natawan ko dekh

meri surat kyun milate hain miri taswir se

galiyan de kar bajae qum ke ai rashk-e-masih

ap ne murde jalae hain nai tadbir se

sadqe ai qatil tire mujh tishna-e-didar ki

tishnagi jati rahi ab-e-dam-e-shamshir se

ishwe se ghamze se shokhi se ada se naz se

mitne wala hun mita dije kisi tadbir se

ik sawal-e-wasl par do do sazaen den mujhe

tegh se kata zaban ko si diye lab tir se

kuchh na ho ai inqilab-e-asman itna to ho

ghair ki qismat badal jae meri taqdir se

zindagi se kyun na ho nafrat ke mahw-e-zulf hun

qaid-e-hasti mujh ko bedam kam nahin zanjir se