قول اس دروغ گو کا کوئی بھی سچ ہوا ہے

قول اس دروغ گو کا کوئی بھی سچ ہوا ہے

واعظ جہان بھر کا جھوٹا لباریا ہے

کعبے میں جس حسیں کا لگتا نہیں پتا ہے

مل جائے بت کدے میں جو وہ صنم خدا ہے

پوجا نہ کر بتوں کو اپنی ہی کر پرستش

اے بت پرست پتلا تو بھی تو خاک کا ہے

رگ رگ میں یہ بندھی ہے گرد ملال خاطر

وہ صید ہوں کہ جس کا سب گوشت کرکرا ہے

عمر رواں ہے مثل موج رواں گریزاں

بحر جہاں میں انساں پانی کا بلبلا ہے

کرنے کو سر پھٹول جس کوہ کے درے میں

جب میں پکارتا ہوں فرہاد بولتا ہے

وہ بت نہ رام ہوگا بے رب کسی کے چاہے

اے برہمن خدا کا کیا کوئی دوسرا ہے

دنداں کے عاشقوں کے آنسو ہیں در نہیں ہیں

نکلی جو سیتلا ہے وہ بھی تو موتیا ہے

گم زار شادؔ گاہے امروز را بفردا

معلوم یہ کسے ہے کل کیا ہے آج کیا ہے

qaul is darogh go ka koi bhi sach hua hai

waiz jahan bhar ka jhuta labariya hai

kaabe mein jis hasin ka lagta nahin pata hai

mil jae but kade mein jo wo sanam khuda hai

puja na kar buton ko apni hi kar parastish

ai but parast putla tu bhi to khak ka hai

rag rag mein ye bandhi hai gard-e-malal-e-khatir

wo said hun ke jis ka sab gosht karkara hai

umr-e-rawan hai misl-e-mauj-e-rawan gurezan

bahr jahan mein insan pani ka bulbula hai

karne ko sar phutawwal jis koh ke darre mein

jab main pukarta hun farhad bolta hai

wo but na ram hoga be rab kisi ke chahe

ai barahman khuda ka kya koi dusra hai

dandan ke ashiqon ke ansu hain dar nahin hain

nikli jo sitla hai wo bhi to motiya hai

gum zar shad gahe imroz ra bafrada

maalum ye kise hai kal kya hai aj kya hai