قلزم الفت میں وہ طوفان کا عالم ہوا

قلزم الفت میں وہ طوفان کا عالم ہوا

جو سفینہ دل کا تھا درہم ہوا برہم ہوا

تھامنا مشکل دل مضطر کو شام غم ہوا

یاد آتے ہی کسی کی حشر کا عالم ہوا

کیا بتائیں کس طرح گزری شب وعدہ مری

منتظر آنکھیں رہیں دل کا عجب عالم ہوا

دیکھتے رہتے ہیں اس میں سارے عالم کا ظہور

آئینہ دل کا ہمارے رشک جام جم ہوا

وہ عدو کو ساتھ لائے ہیں مرے گھر دیکھیے

شربت دیدار کے نسخے میں داخل سم ہوا

آپ کے تیر نظر سے دل کا بچنا ہے محال

جس کو دیکھا آنکھ بھر کر بس وہی ہم دم ہوا

کس قدر تسکین رنجور محبت کو ہوئی

پیار سے دیکھا جو اس نے زخم کو مرہم ہوا

جب اٹھایا یار نے روئے منور سے نقاب

گر پڑا غش کھا کے کوئی اور کوئی بے دم ہوا

گلشن ہستی میں انساں کی نہیں کچھ زندگی

جو ہوا پیدا مثال قطرۂ شبنم ہوا

گیسوئے پر خم ہوئے ان کے پریشاں سوگ میں

میرے مرنے سے دیار حسن میں ماتم ہوا

بعد مرنے کے ہوا دنیا میں یوں مشہور نازؔ

شان سے تابوت اٹھا دھوم کا ماتم ہوا

qulzum-e-ulfat mein wo tufan ka alam hua

jo safina dil ka tha dirham hua barham hua

thamna mushkil dil-e-muztar ko sham-e-gham hua

yad ate hi kisi ki hashr ka alam hua

kya bataen kis tarah guzri shab-e-waada miri

muntazir ankhen rahen dil ka ajab alam hua

dekhte rahte hain is mein sare alam ka zuhur

aina dil ka hamare rashk-e-jam-e-jam hua

wo adu ko sath lae hain mire ghar dekhiye

sharbat-e-didar ke nuskhe mein dakhil sam hua

ap ke tir-e-nazar se dil ka bachna hai muhal

jis ko dekha ankh bhar kar bas wahi ham dam hua

kis qadar taskin-e-ranjur-e-mohabbat ko hui

pyar se dekha jo us ne zakhm ko marham hua

jab uthaya yar ne ru-e-munawwar se naqab

gir para ghash kha ke koi aur koi be dam hua

gulshan-e-hasti mein insan ki nahin kuchh zindagi

jo hua paida misal-e-qatra-e-shabnam hua

gesue par kham hue un ke pareshan sog mein

mere marne se dayar-e-husn mein matam hua

baad marne ke hua duniya mein yun mashhur naz

shan se tabut utha dhum ka matam hua