قید سے نجات

بارے آئی نجات کی باری

کھل گیا عقدۂ گرفتاری

ہم کو منصب ملا رہائی کا

قید کو جائیداد بیکاری

پاؤں کو چھوڑ بھاگے مار دو سر

سر کو پشتارۂ گرانباری

کوچ ٹھہرا مقام غربت سے

اب وطن چلنے کی ہے تیاری

رخصت اے دوستان زندانی

الوداع اے غم گرفتاری

الرحیل اے مشقت ہر زور

الفراق اے ہجوم ناچاری

دال فے عین اے کتابت قید

گاف میم اے حساب سرکاری

دال چاول سے کہہ دو رخصت ہوں

پانی میں ڈوبے یہ نمک کھاری

مچھلیوں سے کہو کہ ہٹ کے سڑیں

گھاس کھودے یہاں کی ترکاری

چینی برہما ملائی مدراسی

اہل آشام جنگلی تاتاری

اپنے دیدار سے معاف کریں

اپنی باتوں سے دیں سبکساری

کالے پانی سے ہوتے ہیں رخصت

اشک شادی ہیں آنکھوں سے جاری

بیٹھتے ہیں جہاز دوری پر

اٹھتے ہیں لنگر گرانباری

کرم اے خضر المدد اے نوح

رحم اے فضل حضرت باری

السلام اے خروش بحر محیط

السفر اے سفینۂ جاری

زاد راہ سفر توکل ہے

رہنمائی کو اس کی غفاری

ہے ارادہ کہ فکر شعر کریں

تاکہ ہو دور رنج بیکاری

بسکہ برسوں رہا ہوں زنداں میں

بھولی قصر سخن کی معماری

bare ai najat ki bari

khul gaya uqda-e-giraftari

ham ko mansab mila rihai ka

qaid ko jaidad bekari

paon ko chhor bhage mar do sar

sar ko pushtarra-e-giranbari

kuch thahra maqam-e-ghurbat se

ab watan chalne ki hai tayyari

rukhsat ai dostan-e-zindani

alwida ai gham-e-giraftari

alrrahil ai mashaqqat har zor

alfiraq ai hujum-e-nachari

dal fe ain ai kitabat qaid

gaf mem ai hisab-e-sarkari

dal chawal se kah do rukhsat hun

pani mein dube ye namak khari

machhliyon se kaho ke hat ke saren

ghas khode yahan ki tarkari

chini birhama milai madrasi

ahl-e-asham jangli tatari

apne didar se muaf karen

apni baton se den subuksari

kale pani se hote hain rukhsat

ashk shadi hain ankhon se jari

baithte hain jahaz-e-duri par

uthte hain langar-e-giranbari

karam ai khizr-e-almadad ai nuh

rahm ai fazl-e-hazrat-e-bari

alssalam ai kharosh bahr-e-muhit

alssafar ai safina-e-jari

zad-e-rah-e-safar tawakkul hai

rahnumai ko us ki ghaffari

hai irada ke fikr-e-sher karen

take ho dur ranj bekari

baske barson raha hun zindan mein

bhuli qasr-e-sukhan ki memari