قید دل سے ہے مری کاکل پیچاں نازاں — شاہ آثم

Arooz is now on the App Store, for iPhone and iPad. Download →

قید دل سے ہے مری کاکل پیچاں نازاں

اور مرے قتل سے ہے خنجر مژگاں نازاں

ہے مری چنگل وحشت سے گریباں نازاں

اور مری بارش اشکوں سے ہے داماں نازاں

کافر عشق ہوا جب سے میں اس دہر میں ہوں

ہے مرے کفر سے یہ دین اور ایماں نازاں

زخم کھانے سے مرے فخر کناں ہے یہ دل

خون دل سے ہیں مرے دیدۂ گریاں نازاں

ساکن خانۂ زنجیر ہوا ہوں جب سے

مثل ہر حلقۂ زنجیر ہے زنداں نازاں

ہوں وہ مجنوں کہ مرے آبلہائے پا سے

دشت وحشت میں ہے ہر خار بیاباں نازاں

محو عشق شہ خادم ہوں میں آثمؔ یکسر

حسن پر جس کے ہیں یہ میرے دل و جاں نازاں