قیامت ہے شب وعدہ کا اتنا مختصر ہونا

قیامت ہے شب وعدہ کا اتنا مختصر ہونا

فلک کا شام سے دست و گریبان سحر ہونا

شب تاریک نے پہلو دبایا روز روشن کا

زہے قسمت مرے بالیں پہ تیرا جلوہ گر ہونا

ہوائے تند سے کب تک لڑے گا شعلۂ سرکش

عبث ہے خود نمائی کی ہوس میں جلوہ گر ہونا

دیار بے خودی ہے اپنے حق میں گوشۂ راحت

غنیمت ہے گھڑی بھر خواب غفلت میں بسر ہونا

وہی ساقی وہی ساغر وہی شیشہ وہی بادہ

مگر لازم نہیں ہر ایک پر یکساں اثر ہونا

سنا کرتے تھے آج آنکھوں سے دیکھیں دیکھنے والے

نگاہ یاسؔ کا سنگیں دلوں پر کارگر ہونا

qayamat hai shab-e-waada ka itna mukhtasar hona

falak ka sham se dast-o-gareban-e-sahar hona

shab-e-tarik ne pahlu dabaya roz-e-raushan ka

zahe qismat mire balin pe tera jalwa gar hona

hawa-e-tund se kab tak larega shola-e-sarkash

abas hai khud numai ki hawas mein jalwa gar hona

dayar-e-be khudi hai apne haq mein gosha-e-rahat

ghanimat hai ghari bhar khwab-e-ghaflat mein basar hona

wahi saqi wahi saghar wahi shisha wahi bada

magar lazim nahin har ek par yaksan asar hona

suna karte the aj ankhon se dekhen dekhne wale

nigah-e-yas ka sangin dilon par kargar hona