فکر ہے شوق کمر عشق دہاں پیدا کروں

فکر ہے شوق کمر عشق دہاں پیدا کروں

چاہتا ہوں ایک دل میں دو مکاں پیدا کروں

طبع عالی سے اگر اوج بیاں پیدا کروں

میں زمین شعر میں بھی آسماں پیدا کروں

ہوں میں وہ دل سوختہ تاثیر آہ گرم سے

گلشن جنت میں بھی دور خزاں پیدا کروں

پاؤں کہتے ہیں ترے کوچے میں آ کر ضعف سے

تو گرا دے اور میں خواب گراں پیدا کروں

اب بھی تم آؤ تو میں آنکھوں میں بہر یک نظر

ڈھونڈ کر تھوڑی سی جان ناتواں پیدا کروں

میں ہوں اے تسلیمؔ شاگرد نسیمؔ دہلوی

چاہیئے استاد کا طرز بیاں پیدا کروں

fikr hai shauq kamar ishq dahan paida karun

chahta hun ek dil mein do makan paida karun

tab-e-ali se agar auj-e-bayan paida karun

main zamin-e-sher mein bhi asman paida karun

hun main wo dil sokhta tasir ah-e-garm se

gulshan-e-jannat mein bhi daur-e-khizan paida karun

paon kahte hain tire kuche mein a kar zof se

tu gira de aur main khwab-e-giran paida karun

ab bhi tum ao to main ankhon mein bahr-e-yak nazar

dhund kar thori si jan-e-natawan paida karun

main hun ai taslim shagird nasim-e-duhulwi

chahiye ustad ka tarz-e-bayan paida karun