قبر پر ہوویں دو نہ چار درخت

قبر پر ہوویں دو نہ چار درخت

ایک کافی ہے سایہ دار درخت

تھا میں دیوانہ گور پر ہے ضرور

بید مجنوں کا سایہ دار درخت

ہوں وہ بد بخت میرے سائے سے

خشک ہوتے ہیں بار دار درخت

تو جو اے سرو باغ میں جائے

ثمر و گل کریں نثار درخت

پست ہوں تجھ سے غیرت طوبیٰ

ایک کیا ہوں اگر ہزار درخت

واہ رے میرے آہ کے جھونکے

اڑتے پھرتے ہیں کاہ وار درخت

میں جو تاثیر آہ دکھلاؤں

کوہ ہل جائیں درکنار درخت

باغ ہستی میں ضعف پیری سے

رندؔ ہوں مثل بیخ خار درخت

باغباں کیوں نہ جانے اس کو فضول

کر چکے اپنی جب بہار درخت

qabr par howen do na char darakht

ek kafi hai saya dar-e-darakht

tha main diwana gor par hai zarur

baid-e-majnun ka saya dar-e-darakht

hun wo bad bakht mere sae se

khushk hote hain bar dar-e-darakht

tu jo ai sarw-e-bagh mein jae

samar-o-gul karen nisar darakht

past hun tujh se ghairat-e-tuba

ek kya hun agar hazar darakht

wah re mere ah ke jhonke

urte phirte hain kah war darakht

main jo tasir ah dikhlaun

koh hal jaen darkanar darakht

bagh-e-hasti mein zof-e-piri se

rind hun misl-e-bekh khar darakht

baghban kyun na jane us ko fuzul

kar chuke apni jab bahar darakht