فکر ہے ماہ کے جو شہر بدر کرنے کی

فکر ہے ماہ کے جو شہر بدر کرنے کی

ہے سزا تجھ پہ یہ گستاخ نظر کرنے کی

کہہ حدیث آنے کی اس کے جو کیا شادی مرگ

نامہ بر کیا چلی تھی ہم کو خبر کرنے کی

کیا جلی جاتی ہے خوبی ہی میں اپنی اے شمع

کہہ پتنگے کے بھی کچھ شام و سحر کرنے کی

اب کے برسات ہی کے ذمے تھا عالم کا وبال

میں تو کھائی تھی قسم چشم کے تر کرنے کی

پھول کچھ لیتے نہ نکلے تھے دل صد پارہ

طرز سیکھی ہے مرے ٹکڑے جگر کرنے کی

ان دنوں نکلے ہے آغشتہ بہ خوں راتوں کو

دھن ہے نالے کو کسو دل میں اثر کرنے کی

عشق میں تیرے گزرتی نہیں بن سر پٹکے

صورت اک یہ رہی ہے عمر بسر کرنے کی

کاروانی ہے جہاں عمر عزیز اپنی میرؔ

رہ ہے درپیش سدا اس کو سفر کرنے کی

fikr hai mah ke jo shahr badar karne ki

hai saza tujh pe ye gustakh nazar karne ki

kah hadis ane ki us ke jo kya shadi-e-marg

nama bar kya chali thi ham ko khabar karne ki

kya jali jati hai khubi hi main apni ai shama

kah patange ke bhi kuchh sham-o-sahar karne ki

ab ke barsat hi ke zimme tha alam ka wabal

main to khai thi qasam chashm ke tar karne ki

phul kuchh lete na nikle the dil-e-sad para

tarz sikhi hai mire tukre jigar karne ki

in dinon nikle hai aghashta ba khun raton ko

dhun hai nale ko kisu dil mein asar karne ki

ishq mein tere guzarti nahin ban sar patke

surat ik ye rahi hai umr basar karne ki

karwani hai jahan umr-e-aziz apni mir

rah hai darpesh sada us ko safar karne ki