قاضی کے منہ پہ ماری ہے بوتل شراب کی

قاضی کے منہ پہ ماری ہے بوتل شراب کی

یہ عمر بھر میں ایک ہوئی ہے ثواب کی

اے یار تیرے لب پہ تبسم نہیں نمود

پیدا ہے ماہ نو سے کرن آفتاب کی

آیا مژہ پہ لخت دل بے قرار یاد

گردش جو ہم نے سیخ پہ دیکھی کباب کی

تیری کدورتوں نے مجھے خاک کر دیا

تیرے غبار نے مری مٹی خراب کی

میری خطائیں آ نہیں سکتی شمار میں

گنتی ہو کیا ترے کرم بے حساب کی

ساقی ترے کرم سے یہ امید ہے مجھے

ہو روز حشر ہاتھ میں بوتل شراب کی

مستان عشق آئے تعلی پر اے فلک

اب خیر مانگ تو قدح آفتاب کی

نشہ زمیں سے سوئے فلک لے اڑا مجھے

ساقی شراب نے مری مٹی خراب کی

دو روز جا کے آبنہ‌ رویوں کی بزم میں

کیا شکل ہو گئی دل خانہ خراب کی

بجلی نہیں تڑپتی ہے اے دل یہ آسمان

پرواز اڑا رہا ہے ترے اضطراب کی

ابرو کی تیغ سے جو بچا میں تو یار نے

برچھی لگائی بڑھ کے نگاہ عتاب کی

اللہ رے اثر مری بخت سیاہ کا

پیری میں احتیاج نہیں ہے خضاب کی

ناظمؔ مرے گناہ ہیں باہر حساب سے

تشویش کچھ نہیں مجھے روز حساب کی

qazi ke munh pe mari hai botal sharab ki

ye umr bhar mein ek hui hai sawab ki

ai yar tere lab pe tabassum nahin numud

paida hai mah-e-nau se kiran aftab ki

aya mizha pe lakht-e-dil-e-be qarar yad

gardish jo ham ne sikh pe dekhi kabab ki

teri kuduraton ne mujhe khak kar diya

tere ghubar ne miri mitti kharab ki

meri khataen a nahin sakti shumar mein

ginti ho kya tire karam-e-be hisab ki

saqi tire karam se ye ummid hai mujhe

ho roz-e-hashr hath mein botal sharab ki

mustan ishq ae taalli par ai falak

ab khair mang to qadah-e-aftab ki

nasha zamin se su-e-falak le ura mujhe

saqi sharab ne miri mitti kharab ki

do roz ja ke abna rawiyon ki bazm mein

kya shakl ho gai dil khana kharab ki

bijli nahin tarapti hai ai dil ye asman

parwaz ura raha hai tire iztirab ki

abru ki tegh se jo bacha mein to yar ne

barchhi lagai barh ke nigah-e-itab ki

allah re asar miri bakht-e-siyah ka

piri mein ehtiyaj nahin hai khizab ki

nazim mire gunah hain bahar hisab se

tashwish kuchh nahin mujhe roz-e-hisab ki