قبر سے اٹھ کے یہی دھیان مکرر آیا

قبر سے اٹھ کے یہی دھیان مکرر آیا

وہ تو آئے نہیں میں آپ میں کیوں کر آیا

وعدہ کس شخص کا اور وہ بھی نہایت کچا

ہم بھی کیا خوب ہیں، سچ مچ ہمیں باور آیا

مجھ سے وہ صلح کو اس شان سے آئے گویا

جنگ کے واسطے دارا سے سکندر آیا

جذبۂ شوق کی تاثیر اسے کہتے ہیں

سن کے قاصد کی خبر آپ وہ در پر آیا

خاک ہونے کا مرے ذکر نہ آیا ہو کہیں

آج اس بزم سے کچھ غیر مکدر آیا

اڑ گئے ہوش کہ پیغامِ اجل ہے یہ جواب

کوچۂ یار سے زخمی جو کبوتر آیا

دلِ صد چاک میں ہے کاکلِ مشکیں کا خیال

کہ مجھے گریہ جو آیا تو معطر آیا

اے اجل نیم نگہ کی تو مجھے مہلت دے

اہلِ ماتم میں یہ چرچا ہے کہ دلبر آیا

اپنی محفل سے یہ آزردہ اٹھایا مجھ کو

کہ منانے کے لئے آپ مرے گھر آیا

یہ دیا ہائے مجھے لذتِ آزار نے چین

دل ہوا رنج سے خالی بھی تو جی بھر آیا

آپ مرتے تو ہیں پر جیتے ہی بن آئے گی

شیفتہ ضد پہ جو اپنی وہ ستم گر آیا

qabr se uth ke yahi dhyan mukarrar aya

wo to ae nahin main ap mein kyun kar aya

waada kis shakhs ka aur wo bhi nihayat kachcha

ham bhi kya khub hain, sach much hamen bawar aya

mujh se wo sulh ko is shan se ae goya

jang ke waste dara se sikandar aya

jazba-e-shauq ki tasir use kahte hain

sun ke qasid ki khabar ap wo dar par aya

khak hone ka mire zikr na aya ho kahin

aj is bazm se kuchh ghair mukaddar aya

ur gae hosh ke paigham-e-ajal hai ye jawab

kucha-e-yar se zakhmi jo kabutar aya

dil-e-sad chak mein hai kakul-e-mushkin ka khayal

ke mujhe girya jo aya to muattar aya

ai ajal nim nigah ki to mujhe mohlat de

ahl-e-matam mein ye charcha hai ke dilbar aya

apni mahfil se ye azurda uthaya mujh ko

ke manane ke liye ap mire ghar aya

ye diya hae mujhe lazzat-e-azar ne chain

dil hua ranj se khali bhi to ji bhar aya

ap marte to hain par jite hi ban aegi

shefta zid pe jo apni wo sitam gar aya