قبر پر وہ بتِ گل فام آیا — مصطفیٰ خان شیفتہ (Mustafa Khan Shefta)

قبر پر وہ بتِ گل فام آیا

بارے مرنا تو مرے کام آیا

دو قدم یاں سے وہ کوچہ ہے مگر

نامہ بر صبح گیا، شام آیا

مر گئے پر نہ گیا رنج کہ وہ

گور پر آئے تو آرام آیا

خیر باد اے ہوسِ کام کہ اب

دل میں شوقِ بتِ خود کام آیا

شمع کی طرح اٹھے ہم بھی جب

دشمنِ تیرہ سر انجام آیا

جب مری آہ فلک پر پہنچی

تب وہ مغرور سرِ بام آیا

جلد منگواؤ شرابِ گل رنگ

شیفتہ ساقیِ گل فام آیا

اس سے میں شکوے کی جا شکرِ ستم کر آیا

کیا کروں تھا مرے دل میں سو زباں پر آیا