Arooz is now on the App Store, for iPhone and iPad. Download →

All poetry

قبلۂ دل کعبۂ جاں اور ہے

Ameer Minai (1829–1900)

قبلۂ دل کعبۂ جاں اور ہے

سجدہ گاہ اہل عرفاں اور ہے

ہو کے خوش کٹواتے ہیں اپنے گلے

عاشقوں کی عید قرباں اور ہے

روز و شب یاں ایک سی ہے روشنی

دل کے داغوں کا چراغاں اور ہے

خال دکھلاتی ہے پھولوں کی بہار

بلبلو اپنا گلستاں اور ہے

قید میں آرام آزادی وبال

ہم گرفتاروں کا زنداں اور ہے

بحر الفت میں نہیں کشتی کا کام

نوح سے کہہ دو یہ طوفاں اور ہے

کس کو اندیشہ ہے برق و سیل سے

اپنا خرمن کا نگہباں اور ہے

درد وہ دل میں وہ سینہ پر ہے داغ

جس کا مرہم جس کا درماں اور ہے

کعبہ رو محراب ابرو اے امیرؔ

اپنی طاعت اپنا ایماں اور ہے