فن کار خود نہ تھی مرے فن کی شریک تھی

فن کار خود نہ تھی مرے فن کی شریک تھی

وہ روح کے سفر میں بدن کی شریک تھی

اترا تھا جس پہ باب حیا کا ورق ورق

بستر کے ایک ایک شکن کی شریک تھی

میں ایک اعتبار سے آتش پرست تھا

وہ سارے زاویوں سے چمن کی شریک تھی

وہ نازش ستارہ و طنار ماہتاب

گردش کے وقت میرے گہن کی شریک تھی

وہ ہم جلیس سانحۂ رحمت نشاط

آسائش صلیب و رسن کی شریک تھی

نا قابل بیان اندھیروں کے باوجود

میری دعائے صبح وطن کی شریک تھی

fan kar khud na thi mire fan ki sharik thi

wo ruh ke safar mein badan ki sharik thi

utra tha jis pe bab-e-haya ka waraq waraq

bistar ke ek ek shikan ki sharik thi

main ek etibar se atish parast tha

wo sare zawiyon se chaman ki sharik thi

wo nazish sitara-o-tannar mahtab

gardish ke waqt mere gahan ki sharik thi

wo ham jalis saneha-e-rahmat-e-nishat

asaish-e-salib-o-rasan ki sharik thi

na qabil-e-bayan andheron ke bawajud

meri dua-e-subh-e-watan ki sharik thi