فغان و آہ سے پیدا کیا درد جدائی کو

فغان و آہ سے پیدا کیا درد جدائی کو

غضب میں جان کو ڈالا جتا کر آشنائی کو

مٹایا پاس رسوائی سے میری آشنائی کو

بچھاؤں آپ کی عصمت کو اوڑھوں پارسائی کو

نہ آیا بعد مردن بھی لحد پر فاتحہ پڑھنے

میں اتنا بھی نہ سمجھا تھا تری ناآشنائی کو

نہ دل اپنا ہوا اپنا نہ اک بت پر ہوا قابو

کریں گے یاد کیا ہم اے خدا تیرے خدائی کو

کسی محفل میں جس دم ذکر شمع طور ہوتا ہے

دکھا دیتے ہیں وہ جل کر سر انگشت حنائی کو

فقیر بے نوا اس کے در دولت کا ہے بندہ

غنیمت جانتے ہیں شاہ تک جس کی گدائی کو

اثر پیدا کرے گی آہ اپنی یار کے دل میں

نشانے تک خدا پہنچائے گا تیر ہوائی کو

کبھی ہے فکر دنیا کی کبھی عقبیٰ کا دھڑکا ہے

اتاروں جامۂ تن سے میں کیوں کر اس دلائی کو

گریباں ہاتھ آتا ہے نہ صحرا تک پہنچتا ہوں

خدا کے واسطے دیکھو مرے بے دست و پائی کو

فلک وہ تفرقہ پرواز عالم ہے دلا سر پر

غنیمت جانتا ہوں گور تک اپنی رسائی کو

شکستہ دل ہیں ہر دم ہر گھڑی ہیں جان کے لالے

کروں کیا نوش دارو کو میں کیا لوں موسیائی کو

تمنائے دلی نے منتہیؔ کھویا مشیخت کو

ملایا خاک میں دست ہوس نے میرزائی کو

fughan-o-ah se paida kiya dard-e-judai ko

ghazab mein jan ko dala jata kar ashnai ko

mitaya pas-e-ruswai se meri ashnai ko

bichhaun ap ki ismat ko orhun parsai ko

na aya baad murdan bhi lahad par fatiha parhne

main itna bhi na samjha tha tiri naashnai ko

na dil apna hua apna na ik but par hua qabu

karenge yad kya ham ai khuda tere khudai ko

kisi mahfil mein jis dam zikr-e-sham-e-tur hota hai

dikha dete hain wo jal kar sar angishat-e-hinai ko

faqir-e-be nawa us ke dar-e-daulat ka hai banda

ghanimat jante hain shah tak jis ki gadai ko

asar paida karegi ah apni yar ke dil mein

nishane tak khuda pahunchaega tir-e-hawai ko

kabhi hai fikr duniya ki kabhi uqba ka dharka hai

utarun jama-e-tan se main kyun kar is dilai ko

gareban hath ata hai na sahra tak pahunchta hun

khuda ke waste dekho mire be dast-o-pai ko

falak wo tafriqa parwaz alam hai dila sar par

ghanimat janta hun gor tak apni rasai ko

shikasta dil hain har dam har ghari hain jan ke lale

karun kya nosh daru ko main kya lun musyai ko

tamanna-e-dili ne muntahi khoya mashikhat ko

milaya khak mein dast-e-hawas ne mirzai ko