اثر آہ دل زار کی افواہیں ہیں

اثر آہ دل زار کی افواہیں ہیں

یعنی مجھ پر کرم یار کی افواہیں ہیں

شرم اے نالۂ دل خانۂ اغیار میں بھی

جوش افغان عزا بار کی افواہیں ہیں

کب کیا دل پہ مرے پند و نصیحت نے اثر

ناصح بیہودہ گفتار کی افواہیں ہیں

جنس دل کے وہ خریدار ہوئے تھے کس دن

یہ یونہی کوچہ و بازار کی افواہیں ہیں

قیس و فرہاد کا منہ؟ مجھ سے مقابل ہوں گے؟

مردم وادی و کہسار کی افواہیں ہیں

یہ بھی کچھ بات ہے میں اور کروں غیر سے بات

تم نہ مانو کہ یہ اغیار کی افواہیں ہیں

کس توقع پہ جئیں شیفتہؔ مایوس کرم

غیر پر بھی ستم یار کی افواہیں ہیں

asar-e-ah dil-e-zar ki afwahen hain

yaani mujh par karam yar ki afwahen hain

sharm ai nala-e-dil khana-e-aghyar mein bhi

josh-e-afghan aza bar ki afwahen hain

kab kiya dil pe mire pand-o-nasihat ne asar

naseh-e-behoda guftar ki afwahen hain

jins-e-dil ke wo kharidar hue the kis din

ye yunhi kucha-o-bazar ki afwahen hain

qais-o-farhad ka munh? mujh se muqabil honge?

mardum wadi-o-kohsar ki afwahen hain

ye bhi kuchh bat hai main aur karun ghair se bat

tum na mano ke ye aghyar ki afwahen hain

kis tawaqqo pe jiyen shefta mayus-e-karam

ghair par bhi sitam-e-yar ki afwahen hain