فقیرانہ آئے صدا کر چلے

فقیرانہ آئے صدا کر چلے

کہ میاں خوش رہو ہم دعا کر چلے

جو تجھ بن نہ جینے کو کہتے تھے ہم

سو اس عہد کو اب وفا کر چلے

شفا اپنی تقدیر ہی میں نہ تھی

کہ مقدور تک تو دوا کر چلے

پڑے ایسے اسباب پایان کار

کہ ناچار یوں جی جلا کر چلے

وہ کیا چیز ہے آہ جس کے لیے

ہر اک چیز سے دل اٹھا کر چلے

کوئی ناامیدانہ کرتے نگاہ

سو تم ہم سے منہ بھی چھپا کر چلے

بہت آرزو تھی گلی کی تری

سو یاں سے لہو میں نہا کر چلے

دکھائی دیئے یوں کہ بے خود کیا

ہمیں آپ سے بھی جدا کر چلے

جبیں سجدہ کرتے ہی کرتے گئی

حق بندگی ہم ادا کر چلے

پرستش کی یاں تک کہ اے بت تجھے

نظر میں سبھوں کی خدا کر چلے

جھڑے پھول جس رنگ گلبن سے یوں

چمن میں جہاں کے ہم آ کر چلے

نہ دیکھا غم دوستاں شکر ہے

ہمیں داغ اپنا دکھا کر چلے

گئی عمر در بند فکر غزل

سو اس فن کو ایسا بڑا کر چلے

کہیں کیا جو پوچھے کوئی ہم سے میرؔ

جہاں میں تم آئے تھے کیا کر چلے

faqirana ae sada kar chale

ke miyan khush raho ham dua kar chale

jo tujh bin na jine ko kahte the ham

so is ahd ko ab wafa kar chale

shifa apni taqdir hi mein na thi

ke maqdur tak to dawa kar chale

pare aise asbab payan-e-kar

ke nachar yun ji jala kar chale

wo kya chiz hai ah jis ke liye

har ik chiz se dil utha kar chale

koi naummidana karte nigah

so tum ham se munh bhi chhupa kar chale

bahut arzu thi gali ki tiri

so yan se lahu mein naha kar chale

dikhai diye yun ke be khud kiya

hamen ap se bhi juda kar chale

jabin sajda karte hi karte gai

haq-e-bandagi ham ada kar chale

parastish ki yan tak ke ai but tujhe

nazar mein sabhon ki khuda kar chale

jhare phul jis rang gulban se yun

chaman mein jahan ke ham a kar chale

na dekha gham-e-dostan shukr hai

hamen dagh apna dikha kar chale

gai umr dar band-e-fikr-e-ghazal

so is fan ko aisa bara kar chale

kahen kya jo puchhe koi ham se mir

jahan mein tum ae the kya kar chale