فراق یار نے بے چین مجھ کو رات بھر رکھا

فراق یار نے بے چین مجھ کو رات بھر رکھا

کبھی تکیہ ادھر رکھا کبھی تکیہ ادھر رکھا

شکست دل کا باقی ہم نے غربت میں اثر رکھا

لکھا اہل وطن کو خط تو اک گوشہ کتر رکھا

برابر آئینے کے بھی نہ سمجھے قدر وہ دل کی

اسے زیر قدم رکھا اسے پیش نظر رکھا

مٹائے دیدہ و دل دونوں میرے اشک خونیں نے

عجب یہ طفل ابتر تھا نہ گھر رکھا نہ در رکھا

تمہارے سنگ در کا ایک ٹکڑا بھی جو ہاتھ آیا

عزیز ایسا کیا مر کر اسے چھاتی پہ دھر رکھا

جناں میں ساتھ اپنے کیوں نہ لے جاؤں گا ناصح کو

سلوک ایسا ہی میرے ساتھ ہے حضرت نے کر رکھا

نہ کی کس نے سفارش میری وقت قتل قاتل سے

کماں نے ہاتھ جوڑے تیغ نے قدموں پہ سر رکھا

غضب برسے وہ میرے آتے ہی معلوم ہوتا ہے

جگہ خالی جو پائی یار کو غیروں نے بھر رکھا

بڑا احساں ہے میرے سر پہ اس کی لغزش پا کا

کہ اس نے بے تحاشا ہاتھ میرے دوش پر رکھا

زمیں میں دانۂ گندم صدف میں ہم ہوے گوہر

ہمارے عجز نے ہر معرکہ میں ہم کو در رکھا

ترے ہر نقش پا کو رہ گزر میں سجدہ گہ سمجھے

جہاں تو نے قدم رکھا وہاں میں نے بھی سر رکھا

امیر اچھا شگون مے کیا ساقی کی فرقت میں

جو برسا ابر رحمت جائے مے شیشوں میں بھر رکھا

firaq-e-yar ne be chain mujh ko rat bhar rakha

kabhi takiya idhar rakha kabhi takiya idhar rakha

shikast-e-dil ka baqi ham ne ghurbat mein asar rakha

likha ahl-e-watan ko khat to ik gosha katar rakha

barabar aine ke bhi na samjhe qadar wo dil ki

use zer-e-qadam rakha use pesh-e-nazar rakha

mitae dida-o-dil donon mere ashk-e-khunin ne

ajab ye tifl-e-abtar tha na ghar rakha na dar rakha

tumhare sang dar ka ek tukra bhi jo hath aya

aziz aisa kiya mar kar use chhati pe dhar rakha

janan mein sath apne kyun na le jaunga naseh ko

suluk aisa hi mere sath hai hazrat ne kar rakha

na ki kis ne sifarish meri waqt-e-qatl-e-qatil se

kaman ne hath jore tegh ne qadmon pe sar rakha

ghazab barse wo mere ate hi maalum hota hai

jagah khali jo pai yar ko ghairon ne bhar rakha

bara ehsan hai mere sar pe us ki laghzish-e-pa ka

ke us ne be tahasha hath mere dosh par rakha

zamin mein dana-e-gandum sadaf mein ham hue gauhar

hamare ijz ne har marka mein ham ko dar rakha

tire har naqsh-e-pa ko rah guzar mein sajda gah samjhe

jahan tu ne qadam rakha wahan main ne bhi sar rakha

amir achchha shugun-e-mai kiya saqi ki furqat mein

jo barsa abr-e-rahmat jae mai shishon mein bhar rakha