فرط شوق اس بت کے کوچہ میں لگا لے جائے گا

فرط شوق اس بت کے کوچہ میں لگا لے جائے گا

کعبۂ مقصود تک مجھ کو خدا لے جائے گا

کاٹ کر پر بھی مجھے صیاد بے قابو نہ چھوڑ

ناتواں ہوں باد کا جھوکا اڑا لے جائے گا

روتے روتے جان جاوے گی فراق یار میں

اشک کا دریا مرا مردہ بہا لے جائے گا

دل مرا مٹھی میں رکھتے ہو تمہارے ہاتھ سے

چھین کر اک دن اسے دزد حنا لے جائے گا

مصر تک پہنچے نہ جو کنعاں سے وہ یوسف ہوں میں

دست اخواں سے چھٹا تو بھیڑیا لے جائے گا

ایک گل اس باغ کا بوئے وفا رکھتا نہیں

سبزۂ بیگانہ شوق آشنا لے جائے گا

وعدۂ صادق تو عزرائیل سے ہے دیکھیے

اس سرے سے مجھ کو کب تک اس سرا لے جائے گا

باغباں گلشن کے دروازے کو کیا رکھتا ہے بند

کون غنچہ کی کلہ گل کی قبا لے جائے گا

استخواں اجرت میں دیں گے ہم فقیر اے شاہ حسن

عرضی اپنے شوق کی تجھ تک ہما لے جائے گا

کشتیٔ تن بحر ہستی میں رہی برسوں تباہ

پار اسے اک دم میں اس کا ناخدا لے جائے گا

حسن دکھلا دے گا اے بت تجھ میں شان اللہ کی

تیرے آگے عالم اپنی التجا جائے گا

بوسے لے گا دست تیغ قاتل بے باک کے

آتشؔ مقتول اپنا خوں بہا لے جائے گا

fart-e-shauq us but ke kucha mein laga le jaega

kaaba-e-maqsud tak mujh ko khuda le jaega

kat kar par bhi mujhe sayyad-e-be qabu na chhor

natawan hun bad ka jhoka ura le jaega

rote rote jan jawegi firaq-e-yar mein

ashk ka dariya mira murda baha le jaega

dil mira mutthi mein rakhte ho tumhare hath se

chhin kar ik din use duzd-e-hina le jaega

misr tak pahunche na jo kanan se wo yusuf hun main

dast-e-ikhwan se chhuta to bheriya le jaega

ek gul is bagh ka bu-e-wafa rakhta nahin

sabza-e-begana shauq ashna le jaega

waada-e-sadiq to izrail se hai dekhiye

is sire se mujh ko kab tak is sara le jaega

baghban gulshan ke darwaze ko kya rakhta hai band

kaun ghuncha ki kulah gul ki qaba le jaega

ustukhwan ujrat mein denge ham faqir ai shah-e-husn

arzi apne shauq ki tujh tak huma le jaega

kashti-e-tan bahr-e-hasti mein rahi barson tabah

par use ik dam mein us ka nakhuda le jaega

husn dikhla dega ai but tujh mein shan allah ki

tere age alam apni iltija jaega

bose lega dast-e-tegh-e-qatil be bak ke

atish-e-maqtul apna khun baha le jaega