عکس ہے بے تابیوں کا دل کی ارمانوں میں کیوں

عکس ہے بے تابیوں کا دل کی ارمانوں میں کیوں

بے زباں شامل ہوئے جاتے ہیں مہمانوں میں کیوں

ہو گئے دیوانے رخصت بستیوں کی سمت کیا

چھا گئیں ویرانیاں سی پھر بیابانوں میں کیوں

دل کی اس بے رونقی کا ذکر جانے دیجئے

ہو رہی ہیں بستیاں تبدیل ویرانوں میں کیوں

ہے رقابت جزو لازم مہر و الفت کا اگر

اجتماعی عشق پھر ہوتا ہے پروانوں میں کیوں

کیا کسی کٹیا کے اندر جاگ اٹھی ہے زندگی

کھلبلی سی پڑ گئی محلوں میں ایوانوں میں کیوں

بیخ کن تھے جو ستم رانوں کے کل تک اے ندیم

ہو رہا ہے اب شمار ان کا ستم رانوں میں کیوں

امن کے خواہاں ہیں جب افسرؔ جہاں والے تمام

کشمکش رہتی ہے پھر اتنی جہاں بانوں میں کیوں

aks hai be tabiyon ka dil ki armanon mein kyun

be zaban shamil hue jate hain mehmanon mein kyun

ho gae diwane rukhsat bastiyon ki samt kya

chha gain wiraniyan si phir bayabanon mein kyun

dil ki us be raunaqi ka zikr jane dijiye

ho rahi hain bastiyan tabdil wiranon mein kyun

hai raqabat juzw lazim mehr-o-ulfat ka agar

ijtimai ishq phir hota hai parwanon mein kyun

kya kisi kutiya ke andar jag uthi hai zindagi

khalbali si par gai mahlon mein aiwanon mein kyun

bekh kin the jo sitam ranon ke kal tak ai nadim

ho raha hai ab shumar un ka sitam ranon mein kyun

amn ke khwahan hain jab afsar jahan wale tamam

kashmakash rahti hai phir itni jahan banon mein kyun