عیادت

یہ کون آ گیا رخ خنداں لیے ہوئے

عارض پہ رنگ و نور کا طوفاں لیے ہوئے

بیمار کے قریب بصد شان احتیاط

دل داریٔ نسیم بہاراں لیے ہوئے

رخسار پر لطیف سی اک موج سر خوشی

لب پر ہنسی کا نرم سا طوفاں لیے ہوئے

پیشانیٔ جمیل پہ انوار تمکنت

تابندگیٔ صبح درخشاں لیے ہوئے

زلفوں کے پیچ و خم میں بہاریں چھپی ہوئی

اک کاروان نکہت بستاں لیے ہوئے

آ ہی گیا وہ میرا نگار نظر نواز

ظلمت کدے میں شمع فروزاں لیے ہوئے

اک اک ادا میں سیکڑوں پہلوئے دلدہی

اک اک نظر میں پرسش پنہاں لیے ہوئے

میرے سواد شوق کا خورشید نیم شب

عزم شکست ماہ جبیناں لیے ہوئے

درس سکون و صبر بہ ایں اہتمام ناز

نشتر زنیٔ جنبش مژگاں لیے ہوئے

آنکھوں سے ایک رو سی نکلتی ہوئی ہر آن

غرقابئ حیات کا ساماں لیے ہوئے

ہلتی ہوئی نگاہ میں بجلی بھری ہوئی

کھلتے ہوئے لبوں میں گلستاں لیے ہوئے

یہ کون ہے مجازؔ سے سرگرم گفتگو

دونوں ہتھیلیوں پہ زنخداں لیے ہوئے

ye kaun a gaya rukh-e-khandan liye hue

ariz pe rang-o-nur ka tufan liye hue

bimar ke qarib basad shan-e-ehtiyat

dil dari-e-nasim-e-baharan liye hue

rukhsar par latif si ik mauj sar khushi

lab par hansi ka narm sa tufan liye hue

peshani-e-jamil pe anwar-e-tamkanat

tabindagi-e-subh-e-darakhshan liye hue

zulfon ke pech-o-kham mein baharen chhupi hui

ik karwan-e-nikhat-e-bistan liye hue

a hi gaya wo mera nigar-e-nazar nawaz

zulmat kade mein shama farozan liye hue

ik ik ada mein saikron pahlu-e-dildahi

ik ik nazar mein pursish-e-pinhan liye hue

mere sawad-e-shauq ka khurshid nim shab

azm-e-shikast-e-mah jabinan liye hue

dars-e-sukun-o-sabr ba ain ehtimam-e-naz

nashtar zani-e-jumbish-e-mizhgan liye hue

ankhon se ek ro si nikalti hui har an

gharqabi-e-hayat ka saman liye hue

hilti hui nigah mein bijli bhari hui

khulte hue labon mein gulistan liye hue

ye kaun hai majaz se sargarm-e-guftugu

donon hatheliyon pe zanakhdan liye hue