عکس بھی کب شب ہجراں کا تماشائی ہے

عکس بھی کب شب ہجراں کا تماشائی ہے

ایک میں آپ ہوں یا گوشۂ تنہائی ہے

دل تو رکتا ہے اگر بند قبا باز نہ ہو

چاک کرتا ہوں گریباں کو تو رسوائی ہے

طاقت ضبط کہاں اب تو جگر جلتا ہے

آہ سینہ سے نکل لب پہ مرے آئی ہے

میں تو وہ ہوں کہ مرے لاکھ خریدار ہیں اب

لیک اس دل سے دھڑکتا ہوں کہ سودائی ہے

دل بیتاب فغاںؔ امت ایوب نہیں

نہ اسے صبر ہے ہرگز نہ شکیبائی ہے

aks bhi kab shab-e-hijran ka tamashai hai

ek main ap hun ya gosha-e-tanhai hai

dil to rukta hai agar band-e-qaba baz na ho

chak karta hun gareban ko to ruswai hai

taqat-e-zabt kahan ab to jigar jalta hai

ah sina se nikal lab pe mire ai hai

main to wo hun ke mire lakh kharidar hain ab

lek is dil se dharakta hun ke saudai hai

dil-e-betab fughan ummat-e-ayyub nahin

na use sabr hai hargiz na shakebai hai