عکس ہے آئینۂ دہر میں صورت میری

عکس ہے آئینۂ دہر میں صورت میری

کچھ حقیقت نہیں اتنی ہے حقیقت میری

دیکھتا میں اسے کیوں کر کہ نقاب اٹھتے ہی

بن کے دیوار کھڑی ہو گئی حیرت میری

روز وہ خواب میں آتے ہیں گلے ملنے کو

میں جو سوتا ہوں تو جاگ اٹھتی ہے قسمت میری

سچ ہے احسان کا بھی بوجھ بہت ہوتا ہے

چار پھولوں سے دبی جاتی ہے تربت میری

آئینے سے انہیں کچھ انس نہیں بات یہ ہے

چاہتے ہیں کوئی دیکھا کرے صورت میری

میں یہ سمجھوں کوئی معشوق مرے ہاتھ آیا

میرے قابو میں جو آ جائے طبیعت میری

بوئے گیسو نے شگوفہ یہ نیا چھوڑا ہے

نکہت گل سے الجھتی ہے طبیعت میری

ان سے اظہار محبت جو کوئی کرتا ہے

دور سے اس کو دکھا دیتے ہیں تربت میری

جاتے جاتے وہ یہی کر گئے تاکید جلیلؔ

دل میں رکھیے گا حفاظت سے محبت میری

aks hai aina-e-dahr mein surat meri

kuchh haqiqat nahin itni hai haqiqat meri

dekhta main use kyun kar ke naqab uthte hi

ban ke diwar khari ho gai hairat meri

roz wo khwab mein ate hain gale milne ko

main jo sota hun to jag uthti hai qismat meri

sach hai ehsan ka bhi bojh bahut hota hai

char phulon se dabi jati hai turbat meri

aine se unhen kuchh uns nahin bat ye hai

chahte hain koi dekha kare surat meri

main ye samjhun koi maashuq mire hath aya

mere qabu mein jo a jae tabiat meri

bu-e-gesu ne shagufa ye naya chhora hai

nikhat-e-gul se ulajhti hai tabiat meri

un se izhar-e-mohabbat jo koi karta hai

dur se us ko dikha dete hain turbat meri

jate jate wo yahi kar gae takid jalil

dil mein rakhiyega hifazat se mohabbat meri