عمر بھر اس پہ میں مرا ہی کیا

عمر بھر اس پہ میں مرا ہی کیا

وہ مسیحا بھی دم دیا ہی کیا

تھا وہ نا آشنا مزاج ولے

آخرش ہم نے آشنا ہی کیا

عاشقی کے سوا بھی ہم نے اور

جو کیا کام سو برا ہی کیا

کر گئے قیس و کوہکن جو جو

ہم نے اس سے بھی کچھ سوا ہی کیا

گو بھلا یا برا تھا شعر اپنا

سن کے یاروں نے واہ وا ہی کیا

اک نہ اک اس کی زلف برہم سے

پیچ دل پر مرے پڑا ہی کیا

شب فرقت میں منتظرؔ ہر روز

شمع سا دل مرا جلا ہی کیا

umr bhar us pe main mira hi kiya

wo masiha bhi dam diya hi kiya

tha wo na ashna mizaj wale

akhirash ham ne ashna hi kiya

ashiqi ke siwa bhi ham ne aur

jo kiya kam so bura hi kiya

kar gae qais-o-kohkin jo jo

ham ne us se bhi kuchh siwa hi kiya

go bhala ya bura tha sher apna

sun ke yaron ne wah wa hi kiya

ik na ik us ki zulf-e-barham se

pech dil par mire para hi kiya

shab-e-furqat mein muntazir har roz

shama sa dil mira jala hi kiya