عشق ہے اس زلف کا سرتاج آج

عشق ہے اس زلف کا سرتاج آج

ہے رسول حسن کی معراج آج

نوک مژگاں پر نہیں ہے لخت دل

دار پر کھینچا گیا حلاج آج

ترک چشم یار کے تیور ہیں اور

خرمن طاقت کا ہے تاراج آج

تیغ ابرو کل پڑی دل پر مرے

تیر مژگاں کا ہوا آماج آج

چوسے ہیں اس کے مسی آلودہ لب

میں نے نیلم کا کیا پکھراج آج

وصل کی مرضی تھی کل اس شوخ کی

پھر گیا وہ وقت استمزاج آج

لکھا ہے جو وصف ابرو کا وقارؔ

شعر شعری سے نہ لے کیوں باج آج

ishq hai is zulf ka sartaj aj

hai rasul-e-husn ki meraj aj

nok-e-mizhgan par nahin hai lakht-e-dil

dar par khincha gaya hallaj aj

tark-e-chashm-e-yar ke tewar hain aur

khirman-e-taqat ka hai taraj aj

tegh-e-abru kal pari dil par mire

tir-e-mizhgan ka hua amaj aj

chuse hain us ke missi aluda lab

main ne nilam ka kiya pukhraj aj

wasl ki marzi thi kal us shokh ki

phir gaya wo waqt astmizaj aj

likha hai jo wasf-e-abru ka waqar

sher sheri se na le kyun baj aj