عقل دوڑائی بہت کچھ تو گماں تک پہنچے

عقل دوڑائی بہت کچھ تو گماں تک پہنچے

کچھ حقیقت بھی ہے انساں کی کہاں تک پہنچے

عشق کے شعلے بھڑک کر رگ جاں تک پہنچے

آگ سی آگ ہے یہ آگ جہاں تک پہنچے

لڑ گئی ان سے نظر کھچ گئے ابرو ان کے

معرکے عشق کے اب تیر و کماں تک پہنچے

دل سے باہر ہو ترا راز گوارا ہے کسے

یہ کوئی بات نہیں ہے کہ زباں تک پہنچے

مار لے وہ نگۂ ناز تو رتبہ ہو بلند

سر ہو اونچا مرا گر نوک سناں تک پہنچے

کوئی دیوانگئ عشق کا قصہ چھیڑے

سلسلہ اس کا خدا جانے کہاں تک پہنچے

سرخیٔ خار بیاباں یہ پتہ دیتی ہے

کہ ادھر سے ترے دیوانے یہاں تک پہنچے

رند پر کیف بہ یک گردش چشم ساقی

غایت دائرۂ کون و مکاں تک پہنچے

رخ سے پردہ کو ہٹا حسن یقیں تک پہنچا

آخر انسان ہوں یوں عقل کہاں تک پہنچے

راہ میں اور بھی دیوانوں سے ملتے جلتے

پوچھتے پوچھتے ہم ان کے مکاں تک پہنچے

شربت دید نہ ہو تیغ کا پانی ہی سہی

کوئی ٹھنڈک تو مرے قلب تپاں تک پہنچے

لے گئے عشق کی بازی پہ صفائی بیتابؔ

جان پر کھیل گئے جان جہاں تک پہنچے

aql daurai bahut kuchh to guman tak pahunche

kuchh haqiqat bhi hai insan ki kahan tak pahunche

ishq ke shole bharak kar rag-e-jan tak pahunche

ag si ag hai ye ag jahan tak pahunche

lar gai un se nazar khich gae abru un ke

marke ishq ke ab tir-o-kaman tak pahunche

dil se bahar ho tira raz gawara hai kise

ye koi bat nahin hai ke zaban tak pahunche

mar le wo nigah-e-naz to rutba ho buland

sar ho uncha mira gar nok-e-sinan tak pahunche

koi diwangi-e-ishq ka qissa chhere

silsila us ka khuda jane kahan tak pahunche

surkhi-e-khar-e-bayaban ye pata deti hai

ke idhar se tire diwane yahan tak pahunche

rind pur kaif ba yak gardish-e-chashm-e-saqi

ghayat-e-daira-e-kaun-o-makan tak pahunche

rukh se parda ko hata husn-e-yaqin tak pahuncha

akhir insan hun yun aql kahan tak pahunche

rah mein aur bhi diwanon se milte jalte

puchhte puchhte ham un ke makan tak pahunche

sharbat-e-did na ho tegh ka pani hi sahi

koi thandak to mire qalb-e-tapan tak pahunche

le gae ishq ki bazi pe safai betab

jan par khel gae jan-e-jahan tak pahunche