عقدے الفت کے سب اے رشک قمر کھول دئیے

عقدے الفت کے سب اے رشک قمر کھول دئیے

سینہ یوں چاک کیا داغ جگر کھول دیئے

سب حسینوں نے مرے قتل پہ کمریں باندھیں

ڈورے تلواروں کے اور بند سپر کھول دیئے

آ گیا ہوش تری چال کے مشتاقوں کو

حشر کی سن کے صدا دیدۂ تر دیئے

پائی تاروں نے ضیا بڑھ گئی تاریکئ شب

اس نے منہ ڈھانپ کے کانوں کے گہر کھول دیئے

عام باراں کی طرح سے ہے کرم ساقی کا

آئی برسات کہ میخانے کے در کھول دیئے

جا عجب کی نہیں گر اہل محبت روئے

میرے ماتم میں حسینوں نے بھی سر کھول دیئے

آنکھیں کھولے ہوئے سب دیکھ رہے ہیں تجھ کو

دل کے جانے کو یہ عشاق نے در کھول دیئے

امتحان حسرت پرواز کا منظور ہوا

ذبح کر کے مجھے صیاد نے پر کھول دیئے

شرم آئے گی مجھے لوگ سمجھ جائیں گے

تم نے گیسو مرے لاشے پر اگر کھول دیئے

uqde ulfat ke sab ai rashk-e-qamar khol diye

sina yun chak kiya dagh-e-jigar khol diye

sab hasinon ne mire qatl pe kamren bandhen

dore talwaron ke aur band sipar khol diye

a gaya hosh tiri chal ke mushtaqon ko

hashr ki sun ke sada dida-e-tar diye

pai taron ne ziya barh gai tariki-e-shab

us ne munh dhanp ke kanon ke guhar khol diye

am baran ki tarah se hai karam saqi ka

ai barsat ke maikhane ke dar khol diye

ja ajab ki nahin gar ahl-e-mohabbat roe

mere matam mein hasinon ne bhi sar khol diye

ankhen khole hue sab dekh rahe hain tujh ko

dil ke jane ko ye ushshaq ne dar khol diye

imtihan-e-hasrat-e-parwaz ka manzur hua

zabh kar ke mujhe sayyad ne par khol diye

sharm aegi mujhe log samajh jaenge

tum ne gesu mire lashe par agar khol diye